《「碳水化合物」樓市不可缺》

有食極唔肥老友叫我減肥，我話已經很節制，甚至比佢食得仲少，老友話咁就要戒了澱粉質，現在大多數人叫碳水化合物，內地人簡稱碳水。我話已經盡力，除了早餐食一片飛邊多士，晚餐食半碗飯，已經冇碳水落肚，我亦試過戒碳水，體重的確下降，但出現便秘、口臭、皮膚粗糙等毛病，人亦變得非常憔悴，冇氣冇力，連我孫女都話rice makes me stronger 。由此可見，碳水化合物的好處多過壞處，食少一些可以，但戒食就似乎不必。

倘沒租金收入 業主防守力弱

老友可能唔知道，樓市亦有碳水化合物，就是租金，如果沒有租金收入，代表那個物業不是完美，就算有升值潛力，業主亦會隨時將物業賣走；反之，如果每一個月都有租金收入，就算樓價下跌，業主都不會隨便將物業賣走。

換句話說，租金收入是持有一個物業不可或缺條件，與人類需要碳水化合物一樣，人類缺少碳水化合物，就算體重下降，始終都是不健康；物業沒有租金收入，即使樓價年年上升，業主都不會開心。所以，大多數業主不會將物業空置而等待升值，最多是收少一些租金；減肥的人亦一樣，不應全部放棄碳水化合物，最多是減少一些，唔食咁多飯。