《倘撤辣 代理生意大減》

有心水清的老友話在幾個月前，不少地產界人士，包括地產商、物業代理、測量師等都要求政府撤辣，財政司長陳茂波借咗佢同宗隻聾耳，對市場上要求撤辣的聲音沒有反應，慢慢地聲音自動消失，現在已經聽唔到有人叫政府撤辣，究竟是什麼原因？

現在何止沒有聲音叫政府撤辣，而事實上不少人擔心現在撤辣，尤其是物業代理，因撤辣令他們做少很多生意；地產商就冇所謂，撤辣令他們可以獲得更多利潤；至於一般市民，辣招對初次置業者沒有影響；但有利於物業投資者，即使樓價因撤辣而上升，但不用付辣招稅，可能除笨有精。

買家追價不及業主加幅 成交勢大減

在過去幾個月，叫政府撤辣叫得最勁的族群應該是物業代理，由於當時成交量偏低，撤辣可以令成交量急升，佣金自然增加。不過，現在樓市成交量是過去9年的新高，物業代理就唔希望撤辣，因為在撤辣之後，業主一定會加價，以現在形勢，加10%至15%已經非常忍手；另一方面，買家又唔同，就算付少一些辣招印花稅而可以追價，估計都唔會超過5%，更何况撤辣對初次置業者沒有影響，他們可能唔追價，立竿見影，撤辣立刻令到成交量大幅減少，佣金亦相對地減少，試問物業代理又怎會現在叫政府撤辣？

話說回頭，好彩當時政府頂得住市場撤辣聲音，如果當時撤了辣，今日樓價急升，市民又會話是政府的錯，政府唔應該撤辣。當時叫政府撤辣的人今日就失了蹤，我相信在今次樓市上升之後，以後再唔會有聲音叫政府撤辣。