我爸爸教我:「做生意，先發「勞力」，再動用「智力」，最後用必須使用「財力」才是長久!」點解?
今日睇報紙，就話家農老闆娘簡利珍最近用5000萬買起新界仔天水圍用緊嘅兩間相連舖。 新界仔前排又用咗4800萬買入旁邊相連的兩間舖自用。 前前後後嗰條街，四間合共實用只得千四呎的舖，連手續費，就洗咗過億，兩大菜檔龍頭買入自用霸地盤。 你話呢啲係咪「財力」?
如果你有睇報紙，佢哋最近兩伙人都頻頻掃舖咗億億聲的舖， 霸市佔率，霸地盤。下下每間舖幾千萬起， 要賣幾多菜先夠數?
令我諗起我係一個好幸運嘅小孩子。 最近我賣咗間舖，收到爸爸呢個message。
佢話:「賣一間舖賺幾百萬，如果賣豆腐花要賣一百萬碗，十年八年才賺到。所以爸媽引領大家走財務、地產、鑽石的路，又賺大錢又輕鬆，對啦! 」
我目的唔係想 show off，話炒炒賣賣好。我目的是說，我自問冇我爸爸的引領，我無今日。 我目的係想同你分享佢由細到大教我嘅智慧，我覺得對做生意長遠的「三步曲」好大啟發，但先行好第一步， 一步步向前發展。 亦都解釋咗點解近年家農同新界仔，開始行到第三步，依家要瘋狂買舖。
我爸爸話：
做生意，第一步是「勞力」，第二步是「智力」，第三步是「財力」! 只有行到第三步才會容易長久。
第一步是起步 - 「勞力」。我爸爸由大陸文革時期兩手空空來港， 第一份工是1973年在觀塘電子工廠做檢測QE，返夜班晚上11點至早上7點，工資每月290元。
家農同新界仔都有佢起步嘅時候，相信主要都係靠「勞力」， 勤力啲， 薄利多銷，貨如輪轉，時間做長啲。
第二步是「智力」 - 加速器。
我爸爸打了兩年工廠工，就開始在觀塘雲漢街家樓下租舖開了間「利川士多」，專賣華僑食品。 他入貨椰子一粒買入9角，搾第一遍濃椰漿可賣4.8元，第二第三遍椰汁水可賣三杯，每杯一元。共計4.8+3=7.8元。偷雞加些雲呢拿香精， 特別香，街坊個個飲到上晒癮😜! 後來椰子漲價每粒1.1元，椰漿就漲價6.8元+3=9.8元。賺8倍!
後來他再入貨椰子，上面寫個「囍」字， 就每個賣13-14元俾街坊嫁娶用， 寓意「椰子、椰子、有爺有子」! .... 真有諗頭🤣🤣 (All figures are exact. 我爸爸和我確認了以上數字) 。我聽爸爸講當時都幾好搵，再買樓買車搬屋都是靠佢!
由500呎士多變成5000呎超市(太平超市)，後來在觀塘瑞和街再借用200呎巷仔開始做地產代理。 乜都唔識，周圍問管理處看更攞盤，介紹客之餘，再左手交右手，再交返右手，又賺幾萬至幾十萬。
家農同新界仔都有佢嘅「智力」，先至能夠打低同行做大。
爸爸教我，做生意，必須行第三步「財力」- 才是長久。 他地產代理做到1997年，他決定再憑著他多年地產的經驗再轉型做財務至今日，專攻物業按揭，多謝我哥哥 Steven加入帶領，「康業」成為全香港 No.1 的物業按揭信貸公司 (Money Lender - 2019年市佔率 17.4%，排第二的只有10.4%)。 做銀行做財務，老實說，翹埋隻手都有利息收。做商舖業主做地主，翹埋隻手亦都有租金收。
我自己今時今日做商舖基金也是跟隨我爸爸的步伐。 沒有我爸爸的指導，我沒有今日的本事。
家農同新界仔， 依家就係行緊第三步，用緊佢哋嘅財力去霸地盤。始終可以供買賣的街市街舖數量有限， 霸到地盤就能夠更壟斷街市生意， 新競爭者更加難入嚟競爭。 自用舖，進可攻退可守， 即使30年後攰啦唔做，相信磚頭舖頭都分分鐘值幾十幾百億。 如果佢哋能夠運用財力，控制埋背後嘅蔬菜豬牛羊肉供應鏈的話， 甚至乎透過自己對市場供求的熟悉， 再係金融市場玩埋什麼糧食/牲畜/油籽期貨等買賣，我相信長遠做菜檔每年大賺幾億幾十億唔難。
做生意，「以財力 - 錢搵錢」，遠遠容易過、長久過「以勞力搵錢」。 我爸爸教我:「人始終會老，會慢。但財富就可以一步步累積。」
我唔係叫你依家去炒炒賣賣， 我係叫你依家先打好基礎，用「勞力」先去賺錢，再運用「智力」，再發揮「財力」，長遠時間才是你朋友。 我自己都係2001年由買賣小生意仔，做中介，收幾千蚊顧問費開始。 嗰時都係辛苦錢! 一步一步，廿年後才發展到今日全香港買賣最多街舖及最願意揼錢出嚟幫租客做生意嘅商舖基金公司。
希望我爸爸的創業故事和對我的創業指導，對你長遠做生意亦有所啟發。真心的❤️!
老土都要講句: 「爸爸 I Love You! 」You have to meet him one day, you will love him too
李根興
#如何不愛這爸爸? #做生意的三種力
（文章內容純屬作家個人意見，並不代表本網頁立場）
贊助
