有老友話，英國BNO計劃空前成功，在開始接受申請後不足20日，已經有5000人申請，一個月應該有8000，一年已經接近10萬，而且計劃應該是慢熱，申請人會愈來愈多，可能會超越英國估計的上限15萬人，而咁多人離開香港，樓價一定會大跌。我就話樓市今年價量齊升，一定不會大跌。
料BNO移民申請會愈來愈少
老友講BNO計劃成功，原來都是話比我知樓價會下跌，他可能未聽過新屎坑三日香。BNO計劃已經醞釀多時，亦有不少名人做推廣，理論上接受申請的地方迫爆玻璃，現在只得5000人，而且有一半早已去了英國，在香港只得2500人申請，而且每日去申請的人會愈來愈少，相信英國政府會大失所望。如果第一年只有兩三萬人申請，都唔知點向全世界解釋香港人生活於水深火熱之中，但又唔申請BNO去英國？
老友話完全明白，只不過測試下我的智慧。但有一點他真的不明白，點解英國預測會出現咁大誤差？首先是因為道聽塗說，大家都聽到不少人講，他們的身邊有十多位朋友準備用BNO去英國，連蔡醫生都話身邊有十幾位醫生隨時用BNO走人，這種道聽塗說的說話，英國佬竟然當真，有乜辦法唔出現差誤？
其次是英國佬雖然話幫香港人，但就窒住窒住，要香港人住5年才可以正式申請，批唔批到時才決定。如果唔批，那些香港人點算？老實說，英國佬太低估我們，香港人冇咁蠢，如果英國佬不是諗縮數，只要用BNO申請移民，一定會批，住夠5年可以正式入籍，我相信會多很多人用BNO移民去英國。
若移民要抽籤 首年15萬申請不是夢
我認為BNO計劃如果失敗，主要是英國不懂得將BNO吊高嚟賣，如果任何人走入地產商售樓部可以隨便揀，隨便買，香港樓價就唔會咁貴。香港地產商懂得將新樓吊高嚟賣，又要排隊，又要抽籤，就算抽到選擇亦有限，但如果唔即刻買就有其他買家替補，造成每一次都超額認購，每次都賣個滿堂紅。
如果BNO計劃搞下抽籤，抽到就立刻變成大英帝國子民，唔使等5年後再覆核，抽中唔去就唔可以再申請，保證有很多人會申請，第一年有12萬至15萬人以BNO移民去英國便不是夢話。
