輸錢仍很開心的人

有老友話我澳門仔，應見盡賭仔百態，有冇見過輸了錢仍然很開心的人？我話當然有，而且有兩類，第一類是賭錢時撞啱一條正路，贏了很多錢，唔知條路幾時完，唯有繼續賭，希望輸兩三鋪，就話贏夠走人，同班老友去食飯、尋開心。如果那些賭仔不再回頭，他們可以算是輸了錢都很開心的人，但如果他尋完開心，再回賭場搏殺，再返出嚟的時候都是唔開心。

賭仔贏錢 反後悔買得少

第二類就是那些買圍骰的賭仔，輸咗錢仍然很開心，因為買得少，贏了反而唔開心，後悔買得太少。老友話唔怪之得，佢老婆以前萬幾美元買了一個比特幣，跌到落7000美元仍然非常開心，不但話買得少，仲話畀機會佢入貨。不過，近日比特幣不但上升至5萬美元歴史新高，並且屢次破頂，佢老婆反而愁眉苦面，整日都唔開心，老友了解之後知道老婆並沒有趁低吸納，始終只得一個比特幣，雖然贏了三萬多美元，但後悔買得少，她是有能力買二三十個，現在贏少了幾百萬港元，想開心都唔得。

買比特幣同買圍骰都是一樣，大家都會小注怡情，輸了會覺得是理所當然，反而會開心，贏了就大鑊，會問自己點解唔重槌出擊，反而會唔開心。所以，大家見到買比特幣的人唔開心，千祈唔好以為他們輸了錢，其實，他們嫌贏得少。