歐冠昇發揮「提色」作用

有老友話有冇搞錯，唔通香港冇人才，港交所（0388）竟然要請外援，摩根大通歐冠昇冷手執個熱煎堆，獲委任做行政總裁。我話香港當然有人才，不過愈叻的人愈唔敢替政府打工，在外面搵多幾倍人工，又不用被人評頭品足。我認為歐冠昇是捱義氣，大家亦不用質疑，如果做得唔好就請退位讓賢，總之照合約辦事，各取所需。

港有人才 但唔多敢打政府工

老友話，港交所人才濟濟，點解不在內部提升，唔通港交所沒有大將，又唔想廖化作先鋒，唯有搵歐冠昇頂上？老友又唔好貶低廖化，廖化除了是關公左右手之外，諸葛亮臨死前亦對劉禪講，如果行政上有問題，可以問費禕、蔣琬、廖淳（即是廖化），由此可見廖化其實是文武雙全。

CEO的位置，就好似一篇文章佳句，起點綴提色作用，例如《琵琶行》中「同是天涯淪落人，相逢何必曾相識」，大家未讀過《琵琶行》都識唱。

仲有一點很奇怪，那些佳句可能是外援，例如王勃《滕王閣序》中「落霞與孤鶩齊飛，秋水共長天一色」，這兩句其實是外援，對《滕王閣序》沒有影響，但帶起整篇文章質素。

港交所的確可以不用請外援，但歐冠昇可能會提高港交所質素，老友話我打橫嚟講，我一向都係，老友今日至知。