有年輕朋友同我講，已經申請了BNO護照，隨時可以移民去英國，我首先恭喜，繼而問是否已經辭了職？年輕朋友很愕然，問點解要辭職？我話任何老闆知道伙計即將移民，就會順理成章叫伙計離職，並不是老闆沒有人情味，而事實上老闆亦要早日打算，移民同事的工作崗位要搵人頂替，况且在疫情持續一年，不少老闆已經頂唔住，有伙計移民可能幫了他，正是慳得一個得一個，年輕人唔知道，不少老闆支持BNO計劃的原意，甚至叫伙計申請BNO，目的是替自己慳皮費。
市民好鍾意鬧政府，為了阻止疫情擴散，政府用打游擊戰術，對於有確診地區或者大廈進行強檢，又被人鬧到反肚，英國政府有見及此，於是唔理中國反對，一於開放BNO移民計劃，不過，英國亦唔敢托大，雖然香港有300萬人可以攞BNO，但只是話未來5年有30萬香港人會用BNO離開，第一年就有12萬至15萬人，不少評論員亦以這個數字為根基，斷定大約有3.5萬個住宅單位因業主用BNO移民而放售，樓價今年會大冧。老實說，如果數字預測準確，樓市今年想唔大冧都唔得，我死雞撐飯蓋都冇用，問題是有冇咁多人移民？
每年十幾萬BNO移民 英國太高估自己
香港人好醒目，慷慨赴死易，從容就義難，雖然唔鍾意香港政府，但亦冇打算移民，有移民公司認為，今年最多只有2萬人用BNO移民，與英國估計，一在平地一在天，如果只有2萬人移民，涉及單位不多於5000個，如此供應量不但不會推冧樓市，還可以對樓宇供應不足有多少幫助，我認為英國今次可能太高估自己。
中國政府立刻表示不承認BNO，與香港生意人做法完全不同，現在不少老闆不但承認BNO，並且會祝福攞BNO的伙計去到英國有一個新開始，大家千祈唔好怪那些老闆無情無義，任何老闆都唔會請一個隨時可以離職的伙計，香港人就算做伙計都有做老闆心思，又點會現在去攞BNO，如果真的要去攞BNO，就要與辭職一齊做，最低限度都叫做好嚟好去，唔通要等到被人炒。
