誰可代香港求籤？

有老友問，哪一支籤是最好，其次是什麼，我話現在最好當然是殲20，其次是殲16。老友話唔係，我是否搞錯，籤20是中平，籤16是中吉，我的確搞錯，我以為老友講緊中國戰機。

老友問我有冇求籤，而且信唔信，我話從未求過籤，唔敢講信唔信，求得上上籤又如何，唔通唔使做，但求得下下籤就大鑊了，雖然我唔信求籤，但個心始終會唔係幾舒服，換句話說，求籤是一個「有輸冇贏遊戲」，點解要去求籤，我雖然唔去，但有人樂此不疲，他們不但替自己求籤，而是替香港政府，官員等求籤，這種間接求籤方法是不符合求籤基本條件，求籤首要誠心，代人求籤又怎可以話有誠心，不過，求籤只是過年的一個節目，大家唔好咁認真。

老友話唔知邊個二打六替香港以及澳門求籤，大鑊了，竟然兩支都是下下籤，我有多少不明白，講到求籤就好似簽合約，就算求籤者唔親自去，都要有授權書才可以替人求籤，現在求其搵個二打六替香港澳門求籤，都唔知信好還是唔信好。

求籤是「有輸冇贏遊戲」

如果求籤真係好準確，下下籤代表上天睇唔起香港澳門，反而激起港澳人的鬥心，唔好衰畀過天睇，這亦是毛澤東所講的人定勝天，如果毛澤東唔係咁講，可能年年都走出幾個二打六替國家求籤，一定會有一年是下下籤，試問中國如何發展，求籤這樣嘢，私人玩吓就算，唔好搞到咁大。

政府應該取消所有官方代表求籤，亦表示唔希望有任何機構或者人物代表政府求籤，但並不是禁止求籤，只要他們求自身就可以了。