買樓最佳時機已過

有老友話，今次大鑊了，連老C都話今年樓市上升，而且比我更加進取，我話今年樓市有5％至15％升幅，老C則話會升15％，究竟是什麼原因令到老C轉軚？我話很簡單，老C睇到政府用炒家方法抗疫，估計疫情應該都到尾聲，所以估樓市上升，只不過是按實際情况調整一下，算唔算轉軚我都唔敢講。

政府主動出擊 反映疫情尾聲

老友話不明白，政府內部人才濟濟，毋須要向炒家學習。老友唔知道，炒家的殺手鐧是「快狠準」，政府現在封小區，亦是同樣採用快狠準方法，並且加多一樣，就是要秘密行動。政府主動出擊，代表疫情到達尾聲，當確診個案減少，香港有望解封，內地的購買力到港，樓價自然上升。老C在內地有幾萬個伙計，自然掌握第一手資料，如果仲話樓市下跌，自己都過唔到自己。

老友話，有評論員話樓市悲情，有大量移民離開香港，供應大增，樓價大冧。在這方面，老C又掌握第一手資料，老C亦有移民公司，知道有幾多人真係移民，當中又有幾多人一定要賣樓，如果多人移民，又多人賣樓，老C都唔會話樓價會升15%。老友話，老C掌握各方面資料，預測樓市準確程度應該比我高，這個當然。

我睇樓市最大關鍵是銀行取態，如果銀行積極放貸，樓市想唔升都難，反過來說，如果銀行追數，樓市想唔跌都唔得。現在銀行取態中庸，對樓市不是壞消息，當內地購買力到港，樓價應該會上升，至於那些相信樓市悲情的人，我只能說，他們已錯過了買樓的最佳時機。