買樓主動權 勿輕易放棄

在年初時，有打算買樓的年輕朋友問我意見，稱樓價沒有問題，他又負擔得起，本來我唔想回答，但我睇到那位朋友打算買的單位，雖然不是在最好地區，但已經是區內藍籌屋苑，而且樓層相當高，三個location有了兩個，我都唔敢話睇定啲，而是叫年輕朋友如果真的是有意思買，千祈唔好為了些少樓價放棄主動權，說到底，買樓也是權力遊戲，掌握主動權的人勝算會多一些。

掌握市場脈搏 才可擁眾多物業

年輕朋友話有評論員表示現在太多人用BNO移民，樓價將會大跌，他並不是質疑我的意見，但覺得我有咁多物業，自然會睇好樓市，換句話說，那位說樓市悲情的評論員比較值得信賴。今次大鑊，我又中了伏，真係唔應該畀意見，最後只能話，我的預測經常都錯，唔值得信賴，其實，那位年輕朋友蠢過隻豬，我點解會有咁多物業，就是因為能夠掌握市場脈搏，而我唔知道那位評論員有沒有物業，估計有都唔會多，信一個未能掌握樓市脈搏，戰績不佳的人預測，再講落去都是廢噏。

北水湧港 準買家更要主動

在股市大升、恒指超越3萬點之後，年輕朋友又搵我，話業主反價，所以買唔到樓。我覺得很奇怪，當日只要他簽名，便可以買到那個單位，點解買唔到？

原來年輕朋友最後壓價10萬，他以為以一個千多萬元的單位，壓價10萬，業主一定會接受，點知業主立刻封盤不賣，而現在較低層單位要價多100萬，問我可不可以告業主？我費事畀答案，只是話法律問題，應該請教律師，其實，是年輕朋友自己將主動權交給業主，又怎可以告業主？股市急升是講出一個事實，北水隨時會湧到香港，打算買樓的人應提高警覺，不應為了些少樓價放棄主動權。