![](https://852images.oss-accelerate.aliyuncs.com/images/articles/00000/2423/thumbnail/1607999457124.jpeg)
我近期做訪問,很多時會被記者問及明年樓市會跌幾多,我反問記者點解咁主觀,不是問我升跌幾多,而是跌幾多。原來記者近兩三個月做的訪問,所有專家都認為樓市明年會下跌,只是跌幅各有不同,甚至有專家用悲情樓市來形容,他們替香港業主擔心。我覺得很無謂,使乜替香港業主擔心,他們有咁耐風流,有咁耐折墮。
記者知道我講反話,於是問明年樓市升抑或跌?我話升,而升幅視乎香港幾時可以與內地通關,就算單向通關,即是來港的內地人士不用14天隔離,對樓市都有莫大刺激。我對記者講的時候仍然不知道香港可以獲得疫苗,否則,我的答案不是升,而是一定升。
有老友話我可能唔記得計算BNO計劃,報道說將會有100萬港人移民英國,影響所及有不少住宅單位推出市場,在供應多,需求因經濟轉壞而減少,樓價將會大跌,這是不爭的事實。老友可能不明白,BNO計劃其實是迫香港人賣樓,不過已經到了尾聲,過了今個月,如果以BNO申請英國居留的人仍然擁有香港物業,日後賣樓就要交英國稅。所以,因為移民英國而要賣樓的人已經時日無多,到了明年初,賣唔賣樓都冇所謂,一定要交稅,所以,對明年樓市影響不會太大,老友覺得唔啱聽,冇回應。
倘內地購買力湧港 上半年升幅顯著
每年到了11月、12月以及翌年1月,樓市都會比較淡靜,在春節過後,地產商就會以較接近市價推盤,做成一個小陽春。不過,今年因疫情嚴重,小陽春並沒有出現,到了明年,有可能出現一個較大的小陽春,如果內地購買力及時湧至,樓市在上半年會出現顯著升幅,大行已經察覺到有這個可能性。
大摩開始看好,預測明年住宅樓價有2%升幅,大家千祈唔好以為2%是很少,大行預測通常會逐步加上去,如果明年上半年有升幅,不排除大摩或其他大行會將樓市升幅調高。最後一個理由,今年住宅樓價不跌,代表業主堅守不賣樓,有如此堅毅的業主,我點解要潑冷水。