Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
三月 28, 2024 星期四 多雲 25° 81%

不打算賣樓 切勿叫人開價

 
     
2020/11/17 湯文亮


星期一早上有老友到公司吹水,其間見到有物業代理WhatsApp我,問我們其中一個物業要價幾多,我立刻回覆話公司未有打算出售,多謝費心。老友不明白,點解我唔叫個物業代理先攞一個價,或者是好好價,唔需要推得咁快,我話唔打算賣就唔好浪費別人時間,阻住他們搵食,老友話我做錯,我話做生意各師各法,沒有絕對啱抑或錯。

放棄主動出價 遭「打樁式鋤價」

在疫情之下,很多業主,尤其是只得一個單位的業主都犯了一個毛病,當有物業代理話有客人有興趣他的物業,叫業主出一個價,不少業主根本不打算賣,但又很想知道他們的單位可以賣到多少錢,於是回覆物業代理,叫他的客人出一個價睇下。物業代理會畀一個價,不過一定會大幅低於市價,業主當然唔開心。

我曾經聽過有業主要去EAA告那名物業代理,其實告什麼,是業主自己放棄了主動權,他唔出價,物業代理就有權主動出價,所以,唔打算賣樓,千祈唔好叫物業代理的客人畀一個價,後遺症是可以很大的。

其他物業代理知道有業主心急願意低價賣樓,出價只會愈來愈低,幾個月之後,業主甚至會說早知當日一早賣樓,最後真的會以低價賣走不打算賣的單位,這招叫打樁式鋤價。但如果業主不叫物業代理畀個價,就不會出現一個定點位,沒有定點位就不能給人打樁。

有可能惹上不必要麻煩

大家亦知道銀行是好天遮,當銀行知道他的客戶願意低價賣樓,甚至是自住單位時,必定十分關注那名客戶的戶口,有時候連一些短期小額貸款也不會批核。老實說,在疫情的風頭火勢下,多一事不如少一事,如果唔打算賣樓,千祈唔好對物業代理有反應,更加唔好話畀個價睇吓,無端端將主動權送給了別人,日後仲有可能惹上不必要麻煩。

(文章內容純屬作家個人意見,並不代表本網頁立場)
贊助