Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
四月 22, 2024 星期一 微雨 23° 91%

【做生意 - 時間是你朋友或敵人?】

 
     
2020/09/28 李根興
【做生意 - 時間是你朋友或敵人?】 人生最難逆轉的就是時間。做生意,它是你朋友或敵人,好重要。 你現在經營的生意時間又是朋友或敵人呢? 前幾日同幾個朋友食飯交流下創業心得,佢哋分別做健康、香水、同埋 party room 生意。 仔細傾過乜? 始終係商業秘密,唔多講啦。 但整體上,我話我爸爸教我,做生意,你要知道時間是你朋友或敵人? 如果你班客是重複性購買,或批貨是累積性及隨著時間保值/升值, 唔需要成日轉款或者出新產品,時間就是你朋友。 只要你大致上做得啱,你現有班客/批貨,都可能已經足夠養你成世。月底交租/出糧都輕鬆啲,長遠, 放假旅行都去得多啲。 但如果你班客係「餐搵餐食餐餐清」, 今次幫襯完你,唔知佢幾時返嚟。 班客貪新鮮或者要有新款先可能返嚟買,又或者你批貨係越放越唔值錢, 放多兩放,分分鐘過期,變死貨的話,你要好小心,時間係你敵人。 長遠年紀大, 你開始手腳慢,你會做得好辛苦。放假都少啲。 唔好講人,講我自己嘅成長過程。 我爸爸大陸落嚟,以前係觀塘做士多第一間就係我後面雲漢街呢道、我當年就係樓上出世。之後佢再係下面瑞和街做超級市場, 日做夜做,基本上手停口停。我讀小學時仲成日落去幫手。但批貨呢? 基本上越擺得耐,就分分鐘過期。 班客今日來幫襯, 聽日對面開咗間平啲, 就可能去咗第二間。 班客底,講真,真係唔知有幾多個。 交租出糧,賺埋賺埋無幾多,時間係敵人。 試過幾次唔好彩,畀人爆竊, 甚至乎持槍打劫,我仲被人捉埋去做人質,the only one! 個賊捉住我同警察談判嘅時候,仲係我側邊仲開咗槍先逃走, 成個超級市場嘅閘打穿咗個子彈窿。我無哭,嗰時我得五歲半,唔識驚。Real story! 呢張就係當年我爸爸記錄成個打刧嘅過程。 My point is 嗰時我爸爸明白到都當做生意時間係敵人時,賺錢好辛苦。 萬一大吉利事,一個意外,天災人禍, 好似今時今日社運/肺炎咁, 賺乜都嘔番曬畀佢。 我自己以前2001年起買賣小生意都係一樣, 呢個就係當年我第一個傳媒報導,雖然之後成交過千單, 算係全港最多, 但單單deal都係餐搵餐食餐餐清, 個客今日幫襯完我買盤生意,幾時再回頭幫襯我第二次真係唔知。 我同一時間代理緊個幾佰盤生意,今日就放盤, 聽日就可能東主有變掛,後日就可能盤生意都執埋,過多一年後,全部啲盤都會變晒,資料不斷更新,時間係我敵人。 買賣生意爭拗多,仲要孭好多鑊上身, 畀人爆埋「糖衣陷阱」,做咗十二年嗰時真係做到氣都喘。 依家就唔同啦。 我屋企人生意做康業信貸快遞,我2001年開始,佢哋就1997年開始。我有個好好的爸爸,佢係我偶像! 也有個好叻嘅哥哥。 財務公司, 嚟嚟去去都係借錢收息啫。 每年人客同埋 loan portfolio 就係累積性,重複性。客人每個月都畀利息, 即使翹埋隻手100年唔做嘢, 錢就繼續係錢,利息就繼續照收。 因此香港好多間財務公司都相對地都搵到錢, 因為時間係朋友。 月底啦,雖然一樣要交租出糧,但肯定又收多一個月利息先。 我自己2013年決心轉型做商舖基金都一樣 , 每月每季累積性集資,累積性買舖, 肺炎後,我哋都照樣襯平買咗六間街舖,相信係同期全港最多單,合共1億2千多萬。因為我相信只要買啱位置, 翹埋隻手,租金就重複性收,另外100年後嘅今日都會升咗值。 唔升都重建咗,即係有錢袋! 時間係朋友。 仲記得,以前每逢每個月到25/26號, 心入面馬上都會諗又要出糧交租啦, 今個月跑夠數未? 依家? 老實說,過咗都唔知! 無感覺。 可能仲好,過多幾年賣舖唔使交咁多稅。 你呢? 問心,你需唔需要不斷更新你嘅產品? 你知唔知道你班客會幾時回頭返嚟再幫襯你? 你批貨放喺度多一年十年結果會點? 你班客十年後又會點? 你係咪手停口停,定可以放多啲假呢? 啱啱創業嘅你,唔緊要,絕大部分人,時間都係敵人。 但人會老, 人會懶, 人有惰性,長遠要保持你嘅競爭力, 就盡量慢慢轉去時間係朋友嘅生意。 轉型係需要時間, 分分鐘五年十年, 但「模糊地正確,好過準確地錯誤。」 雖然我唔可以排除,好多千千萬億嘅成功個案,時間都係敵人。 但背後死咗個99967個你唔知。我爸爸教我,做生意就係「捨難取易」。 時間係敵人,定時間係朋友? It's Your Life. Your choice! #時間是朋友或敵人
(文章內容純屬作家個人意見,並不代表本網頁立場)
贊助