《做生意最大死穴?》

《做生意最大死穴?》 - 希望你無俾我講中! 做生意最大死穴是什麼? 最近最多哪類型的商舖執笠? Why? 前兩日見到個做懷舊相機嘅朋友， 係邊個就唔好講啦， 我同佢交流下生意點做嘅時候，就同佢講你有無留意到你盤生意可能係一盤好難做嘅生意。 最大死穴係.... 你做緊「一次性」生意。 你sell完一大輪嘢，人客幫襯你買部幾百幾千元嘅舊相機之後，一次，之後唔知幾時再回頭。 一社運/肺炎，生意額就會大跌。 今個月可以賣1000部機，下個月就分分鐘一部都賣唔出。 根本好難預測下個月或者下年嘅收入。 飯都需要日日食， 但懐舊相機可以十世都唔買。 咁就死啦，生意好嘅時候就入一大批貨， 招兵買馬，開好多分店，飛機大砲樣樣齊， 砸住曬啲現金係道。 大吉利是，一個生意差，就執都執唔切，啲貨分分鐘要用跳樓價清貨。 我話做生意， 盡量要客人 (1) 重複性購買，(2) 累積性， 即係盡量下年今日嘅客，就多過今日嘅客。十年後嘅客，就多過下年嘅客。 你嘅客，貨底或金額可以累積上去。年年增加。 今日我揸住廿間舖，下年大慨知道會多過廿間。今日我有100個基金客，下年我大慨知道會多過100個客。 個個月收租金，個個月收基金管理費，係重覆性嘅，係累積嘅。 做懷舊相機， 做二手車， 包括我以前做咗12年生意買賣都好， 人客幫襯完一次之後，下次真係唔知幾時返嚟。 問題就四萬個，生意就只做一次。 呢盤生意真係好難做，仲記得，我2009年曾經一年我就賣咗172盤生意，但2010年做幾多單，嗰時真係估唔到。 因此過幾年後我我決心轉型。 咁做懷舊相機，點樣可以令到人客係重覆性同埋累積性呢? 我話佢講，你冇諗過把你盤生意變成會員制。例如， 我亂噏啲數字啦，你每個會員收月費300， 咁上嚟你個舖頭嘅時候就免費有杯咖啡， 兼每個月可以換兩部3000蚊以內嘅相機玩下。 如果你收到1000個會員， 咁就已經每個月三十萬穩定收入。 入會再加1000蚊按金，咁就已經130萬 upfront 先袋落袋。 想換多啲次數或者可以玩貴啲嘅相機? 每月就收會費500 800， 甚至1000。分 Entry，Gold, Platinum 或 Diamond 等級，預繳一年嘅，再畀個八折佢。預繳兩年，就再畀個七折佢。咁upfront 及持續性就袋更多錢。 一千個會員，唔會個個月都返嚟。做 Gym 一樣，好多人畀咗錢就唔記得，但即使全部機租出去，一千部機，每部機當成本800蚊，你入貨價就係80萬。 成本80萬，upfront 已經袋咗百幾二百萬， 再加埋佢每次返嚟嘅時候你提供其他配件、服務、 影相團、 進階工作坊等箍住個客， 所有其他嘢都係成本價，但會費先至係純利潤。 條數點計，你自己諗。 或者客人根本唔使親身上嚟，每個月佢寄返部機畀你，你就馬上就換部新機，寄返畀佢玩下。 網上教埋佢點玩，每個月限換兩次機又好，限十次又好，無限次都好，Netflix 當年(1997)就係咁樣開始，郵寄 Movie DVD，會員制度， 畀多啲錢嘅，就無限次更換， 速遞都快啲。 打低咗當年嘅巨無霸 Blockbuster， 成為今日市值近2000億美金嘅公司。 行以上嘅制度，你就累積緊會員，同埋今個月大約知道下個月能夠收幾多會員費， 打風落雨/社運/國安法/肺炎，全街無晒人，都無咁驚。 記住做生意無論點大都好，最忌就係「做一次性」嘅生意。 你睇下而家坊間蝕大本/執笠嘅公司，好多都係一次性的， 大咁又點? 話執就執。 重複性、累積性，你盤生意做唔做到呢? 盛滙商舖基金公司網頁 www.bwfund.com 李根興創業之友 (講生意) https://www.facebook.com/EdwinNetwork/ 李根興商舖之友 (講舖) https://www.facebook.com/edwinprimeshop/