樓盤展銷會可信嗎？

唔可以否定呢個運作模式，無利潤又點會不停咁攪呢，係咪先？展銷可以與發展商合作，一次推幾個項目，感覺好豐富、好多選擇、又唔同地區，花多眼亂，當中比較多以遠期樓花項目出售，提一提大家，樓花好似好低喎（唔爛尾嘅話），一日未到按揭上會都要擔心，因為加拿大政府對樓市調控政策不時修改（偏向收緊來調控），分分鐘諗住貸款無問題變成收樓時批唔到，撻訂就連渣都無…… 除此以外，展銷小心買咗埠仔呀！ 另一方面，如果展銷商有現樓又可以參考一下，現樓始終即時上會，樓宇質素有實物睇點都安心D嘅，至於展銷商會唔會做個 Live 實地拍條片比買家呢？…… 我唔敢講，睇你彩數。另外多口一提，買樓花，無實物睇，試過起好跌露台玻璃，又試過成層用同一set鎖，一條key可以開晒一層單位，唔係當地人，跟本收唔到呢D料咯…… 有事時要你跟就真係頭痕！ 再者有參觀過嘅朋友都知，展銷之後會 Call 爆你、煩到你唔會再夠膽去另一個展銷，哈哈。 真實個案：客人話認識嘅朋友中真係有人喺展銷買樓花後，真係渣都無又一鑊粥，所以都驚（所以先搵我幫手）…… 唔排除有成功個案嘅，羊毛出自羊身上，試諗一下租一個酒店 Ball Room，又飲又食，又咁多人招呼，真係唔洗錢？心中有數喇！當中要跑幾多個客成功買樓呢？無謂倒人米，阻人搵食尤如殺人父母呀，忠告一句：咪咁「天真嬌」喇！