小妹入飛抽東九龍新樓… 抽籤當日…
筆者： 抽到幾多號呀？
小妹： 560幾號，有冇機會？
筆者： 冇啦，每個冧巴都有AB，即係1100幾號啦。
小妹： 咁我聽日使唔使去呀？
筆者： 唔使啦，上次朋友排200內，都要過咗晚飯時間先到佢揀，仲要賣得七七八八，冇乜平嘢揀，到250左右已經賣晒。
小妹： 咁好啦，咁我唔請假啦，唉~~
開售當日…
啱啱食完晏，已經嗌到300幾，而且仲有唔少選擇…
筆者： 小妹有機喎！
代理： 佢响邊度返工？
筆者： 好近~
代理： 過唔過到嚟揀樓？
筆者； 冇請假，唔走得喎！
代理： 閃一閃過嚟有冇計？
筆者： 可以做授權？
代理： 得呀，簽個名即刻走得！
筆者： 即刻安排…
代理： 咁我Call定律師過嚟！
就係咁…小妹成功上車買樓！
再次證明…有危先有機！
點解今次會有咁大分別？
如果大家有留意地產新聞應該知道，同一個地區，同一個發展商，價錢也差不多，短短幾個月之間，點解會有咁大改變呢？明明幾個月前，上一個樓盤，幾百個單位收18000飛，爆到瀉，朋友180幾號都排到天昏地暗，晚飯時間之後先排到去揀樓區，平嘢已經賣得七七八八，另一個朋友250幾號去到已經賣晒！同一個地區，同一個發展商，質素與地點相若，價錢也差不多，點解今次580幾都可以揀到樓，去到過1000都仲有得揀？而且速度快咗咁多？應該是有好多位中籤者放棄吧，點解呢？
好簡單，因為市況轉差！
首先，星期五開售！以往開售一般是星期六、日，多數買家放假，出席率自然高。然而連續幾個月的社會運動，大家都知到每逢週末週日都會有連場示威，甚至有激烈打鬥，市民在那裡？要麼參與遊行集會，要麼躲在家中不敢出來，連搭地鐵都要擔心人身安全啊，仲點會有心機出街？可因為這個原因，發展商轉戰星期五，果然出席人數大跌，尤其200號之後，估計自己冇乜機會，也不會貿然請假，很多人甩底，現場所見尤其200之後，嗌號碼嗌得好快！
其次，市況動盪不安！
社會運動越演越烈，業主都開始捱唔住要劈價了！惠譽剛剛調底香港的評級，國際社會對香港的信心開始動搖，銀行陸陸續續加息，貿易戰又沒有平息跡象，走到市面，冷冷清清，無論外國還是大陸遊客都急劇下跌，種種原因令到個個買家都想睇定啲。所以亦現場亦見到一個現象，上個的樓盤開售，一開始買家以搶大單位為主，然而今次則以搶細單位為主，大約午飯時間，600萬以下的單位就賣晒了，反而大單位就淨番好多，正常的，市況不穩，如果是投資的話，細細哋買間，留番啲錢响身邊。
小妹家人問…擔唔擔心？
正正因為大家都擔心，以上種種條件配合之下，先有機會買得到，如果好似早兩三個月，個個熱門新盤稍為平些少就爆晒飛，唔止東九龍，就連荃灣的新盤，折實呎價近2萬，都超額幾十倍，幾時得嚟咁好彩？當然筆者唔可以擔保樓市唔會繼續下行，尤其是新樓盤冇得好似二手樓咁劈價，現在買樓確實有點風險。不過根據過往的經驗，通常在市靜的時候，都可以買到心水筍盤，就以身邊的親人及學員為例，年初的時候分別買到觀塘及紅磡的新盤，二手筍盤就更加遍佈全港，平100萬都只係普通料，平200萬都唔少！如果唔係市場前景唔明朗，又點會有咁好機會呢？最近劈價潮又來了，又有很多二手單位劈價100萬了，你要把握機會？還是又再後悔？
（文章內容純屬作家個人意見，並不代表本網頁立場）
贊助
