Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
三月 29, 2024 星期五 多雲 27° 71%

買乜屋??

 
     
2018/01/26 Fennie Ng
了解完咁多款物業類型,一定花多眼亂…… 我當大家都銀兩十足,又係咪買乜都啱自己呢?我以一個用家身份同大家分析一下,一定唔係您有錢就走去買間大獨立屋就一定係最好,當然歡迎您咁做,唔會有人阻您嘅! ² 獨立屋、半獨立屋,唔洗交管理費好似好低(長遠計),佔地咁大,又花園、又泳池、又幾千呎室內,咁大塊地,保養要自己做番,其實差不多,而且冬天剷雪都幾甘,係可以比錢人剷雪、剷草,咪又係一條數…… 香港人好多做唔慣覺得辛苦㗎,之後又後悔點解要買間又泳池又草地嘅屋…… 唉,以為請菲傭幫手?Sorry… 加拿大極難請菲傭,好嘅菲傭更難上如難,為咗保障當地勞工,當地人嘅人工一向貴,所以當地人好多自己打理番,如果無時間嘅,真係唔好諗喇,會做死自己。 ² 住開城市咁方便嘅香港人,落街轉個彎就有 7-11、大型超市、商場方便行街 …… 外國要住得獨立屋、半獨立屋又要好似 Downtown咁方便?又要講聲Sorry 呵,咁大塊地唔好諗會喺市區同周邊可以有呢類單位,多數都要市郊偏遠地區,車程有番咁上下,寧靜同繁華係要有取捨嘅,哈哈。 ² 獨立屋、半獨立屋離市區稍遠,唔近商業中心返工,所以比較難出租作投資之用,真係要好大家庭移民先會考慮呢類型房屋,變相需求市場又細咗,相對難甩㗎。多數會係當地人租住,唔及市區租客咁多需求,有留學生、上班一族咁囉。 ² 如果買間屋又有老人家、小朋友一齊住又點揀好呢?年青力壯當然住獨立屋自己打理得到當然無所謂,但老人家就…… 最好選擇單層平房獨立屋 Bungalow或大廈樓房(Condo/ Apartment),點解?獨立屋上面提過打理都辛苦,無謂玩個老人家了,而且獨立屋同排屋(Townhouse)都有幾層,要行上行落,老人家、小朋友一個唔好彩喺樓梯碌落嚟,咪玩喇,減少家居意外可能性為上嘛,唔好話室內樓梯有危險,排屋門前果幾級梯級都有潛在危險性,當遇上落雪、又溶下、凍下,變成冰面就又滑又硬,跌親撞到真係有機會骨裂㗎。都係平地台入到屋安全好多! ² 大廈樓房(Condo/ Apartment)又係咪最好?唔可以咁講,而係 location 同住嘅模式比較接近香港,朋友們會較易接受,香港人唔會太願意花時間自己打理,如果落雪仲要剷清哂先可以出車返工返學,就會覺得自己搵自己笨,始終有管理公司包埋,唔洗壞少少嘢又要自己搵人整一餐,花時間、人力、物力,財力,不如考慮清楚先嘛。 ² 在投資角度上,大廈樓房(Condo/ Apartment)相對有投資價值,一來入門價比較低,選擇比較多,不論租或買嘅需求都比較大,因為加拿大同香港一樣有好多新嘅小家庭,對於600嘅 1房1浴室(新婚家庭、留學生)到 900呎2房 2浴室類型(有小朋友家庭),呢個範圍嘅需求都比較大,就以 Downtown、North York 呢 2個區就比樣易租出,因為 North York 社區比較高級又有公共交通直接出 Downtown,返工、返學都好方便,Downtown 係商業集中地,咁方便唔貪心無租客,出租轉賣亦好快有承接。 ² 更值得留意係加拿大好多屋都係木製的,所以獨立屋、半獨立屋同排屋,好多都隔音不及石屎牆嘅新式樓宇,所以如果當您有幸買到獨立屋、半獨立屋或者排屋都要顧及他人,唔好咁嘈,攪到當地人覺得香港人同某D大國人種一樣咁神憎鬼厭,到時自己攞嚟衰喇,會經常比人投訴㗎。 ² 另外,有關建築問題,普遍加拿大嘅廚房設計99% 為開放式,亦因為好多木製樓房,所以大多數爐頭都會係電熱爐,是基於安全理由嘛,如果一定要裝置明火爐頭,就要問清楚可唔可以改喇。 ² 不論獨立屋、半獨立屋、排屋定多層式樓房,大部份有放置洗衣機及乾衣機嘅獨立區域,而某D多層大廈係不容許住戶將衣服晾曬喺室內窗邊及單位窗外,影響大廈外觀,會發律師信㗎,如果一定要戶外晾衫嘅,咁就買獨立屋、半獨立屋吧,可以喺後院曬到夠,哈哈! 以上都係些少意見,希望大家置業前貨要諗清楚,唔想買咗之後又埋怨問自己點解無人提點呢?自己當初又無諗到呢?好多生活細節同習慣性問題,喺展銷會嘅 Sales 未必會提您,因為跑數,追 Target,賣得快好世界心態,我哋純粹真係放眼在用家角度並考慮同提點細節,做得貼心D,用咁多錢買個物業點都唔想失望而回,朋友轉介先係長做長有嘛。
(文章內容純屬作家個人意見,並不代表本網頁立場)
贊助