物業種類

好多朋友喺香港住咗十幾二十年都係 Apartment，所以好多朋友一提到如果有機會到加拿大買樓（或者海外）就好希望有一間獨立屋，其實都係心理反射，因為自細都“被屈”喺曱甴屋多年，到有能力就個個都想住番大DD嘅屋，無錯嘅，但停背後有好多因素要考慮，又有幾多人會認真諗清楚呢？ 我盡量精簡咁去解釋一下比大家知先，首先要了解有幾多種住宅物業型式，明白之後再諗清楚邊一類型真係適合自己呢？ 1. 獨立屋 Detached：無管理費，因為 Freehold，即係連塊地都係自己嘅 2. 半獨立屋 Semi-Detached：無管理費，因為 Freehold，即係連塊地都係自己嘅 3. 排屋 Townhouse：有管理費，當然要睇間屋幾大而定喇 4. 樓房 Apartment /Condo：有管理費，當然要睇間屋幾大而定喇 大概知道管理權之後，就進一步了解一下唔同種型屋內裡間格…… 1. 獨立屋 Detached：CAD80-800萬起不定： l 睇個名就明喇，完全獨立，唔會有隔離單位痴住，真係日日開 Party 同無人會嘈到您，同樣地呢類型屋佔地大，可以由1,200呎 ~ 6,000呎未計花園佔地（連埋塊地買 Freehold㗎），價錢一定貴DD（但一定點都平過香港獨立屋），有 1.5層、2層、2.5層、3層嘅平房 / 升高平房（Bungalow/ Raised Bungalow）同埋後復式（Back Split）、側復式（Side Split） l 房屋結構聽見都開心，地下通常為大客廳、家庭室（Family Room）、飯廳、廚房、早餐區、書房；每一層通常劃分做幾個睡房 、2 – 3 個洗手間同浴室。 2. 半獨立屋 Semi-Detached： CAD30 – 100萬起不定 l 半獨立，就係有一邊會有隔離單位痴住，同樣地呢類型屋佔地都大㗎，可以由1,200呎 ~ 3,000呎未計花園佔地（連埋塊地買 Freehold㗎），價錢比獨立屋平DD（但一定點都平過香港獨立屋），有 2層、2.5層、3層嘅平房 / 升高平房（Bungalow/ Raised Bungalow）同埋後復式（Back Split）、側復式（Side Split） l 房屋結構大致同獨立屋相似佈局，即係地下通常為大客廳、家庭室（Family Room）、飯廳、廚房、書房；每一層通常劃分做幾個睡房 、2 – 4 個洗手間同浴室。 3. 排屋 Townhouse： CAD80 – 200萬起不定 l 排屋，一睇就知喇，就係一排過，當然無香港D幾十層咁高喇，一排過，左右都有鄰舍痴住，除非咁好彩買到大單邊喇，通常都係 3層高，單位面積大約由1,000~ 2,500呎上下，入口有一排小樓梯要行上去嘅就係呢個特式，亦係方便大雪時唔會塞住咗個大門出唔到去囉。 l 房屋結構大致可分為：地下室 / 半地下室、有一個後院、未必每一間屋都有停車庫，室內佈局有客廳、飯廳、廚房、書房，每一層通常劃分做幾個睡房 、2 – 4 個洗手間同浴室。 4. 樓房Apartment / Condo： CAD40 – 200萬起不定 l 樓房，點去分 Apartment 同 Condo呢？好簡單，一般嘅統稱 Apartment，高級一D稱做 Condo囉。呢類就真係好似香港樓，多位於地少人多區域（無位嘛，咪起高D囉），而新式嘅樓房好多仲標誌住酒店式管理、有大廈會所設施：會議室、健身室、泳池、桑拿室、網球、籃球場、停車場、中央暖氣，咁多設施就一定要收管理費吧，唔同地區，依據樓房大細面積計算，最重要同香港唔同，管理費包哂所以設施任用，唔似香港比完管理費仲同您樣樣囉！ l 至於單位佈局大致都係有客、飯廳、開放式廚房、睡房、書房（通常無窗）、浴室，多數睡房已內置入牆衣櫃，所以睡房相對闊，就算細單位都可以3邊落床，空間感十足嘅。