Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
五月 19, 2024 星期日 微雨 24° 88%

鮑威爾能否捱過今年?

 
     
2019/06/21 湯文亮
有老友同我打賭,雖然一般人認為,美國總統什麼人都可以炒,但就唔能夠炒美國聯儲局主席,但佢有信心,特朗普一定有辦法在今年內一定會炒鮑威爾,今次比佢大到,雖然我很喜歡打賭,但今次真的不敢同佢賭,我話投降輸一半,本來食晚飯,飲紅酒,現在改為食午餐飲啤酒。 無論古今中外,做官最緊要有官威,不少人做官並不是為了份糧,而是為了要威,無論有什麼人提問,可以愛理不理地話了解,如果唔知點樣管理,索性話自律便算數,如果做官不是為了一個「威」字,不如不做,尤其是在香港,雖然有得威,但很多時候被反對派鬧到狗血淋頭,我有時候都替他們可憐,不過,他們又甘之如飴,仲話食得鹹魚抵得渴。 做官最重要有官威 我問老友點解會話鮑威爾捱不過今年,佢話橫睇掂睇,鮑威爾都唔似做官,些少威勢都冇,相比上一任「白髮魔女」耶倫簡直差幾皮,這就是特朗普不敢用耶倫的主要原因。如果耶倫仍然做美國聯儲局主席,特朗普一定不敢咁多聲氣,當日特朗普聽從財長梅努欽的說話,起用鮑威爾做聯儲局主席,就是貪佢聽聽話話,誰不知鮑威爾做了主席之後,唔知聽邊個講冇人可以炒佢,於是唔聽特朗普支笛,唔理特朗普反對,在去年底堅决加息。本來,加息是經過聯儲局委員投票,不是由鮑威爾一人話事,但鮑威爾可以作出引導說話,如果他說唔加,有九成機會可以唔加,加息無形中與特朗普過唔去,况且在中美貿易戰關鍵時刻,加息增加了美國人負擔,特朗普是一個記仇的人,鮑威爾能夠捱到今年底已經顯示特朗普寬宏大量。所以,老友夠膽同人打賭,老鮑一定不可以捱過今年。 貿戰時刻加息 與特朗普結樑子 鮑威爾在去年底加息之後,已經不斷補鑊話沒有再加息需要,到最近話今年可以減息,但始終得個「講」字,特朗普當然不開心,傳聞話準備將老鮑降職,意思即是叫佢自動辭職。有人同我講,美國減息,香港又可以跟隨,樓市將會再創新高,唉!我都唔知點講,除非美國減息9次,香港才有機會跟隨,暫時來說,美國減息與否,與香港無關。
(文章內容純屬作家個人意見,並不代表本網頁立場)
贊助