2019/06/02
李根興
第111故事《兩隻青蛙求生故事》我的博士論文。 你是那一隻青蛙?
而家喺澳門同我細女one-on-one 周圍行街， 啱啱就同佢講咗呢個青蛙嘅故事。 我個女揸機，有啲震呀!
從前有一群青蛙， 喺山上面跳嚟跳去玩。 其中兩隻，唔小心跳咗落個懸崖邊， 差少少跌落去就死啦。 佢哋用兩隻幼幼嘅手拉住個懸崖邊， 喺度掙扎。
其他青蛙見到，就喺懸崖上面講，呢個懸崖咁斜咁深 ，你哋冇可能跳返上嚟㗎啦。 你一係就喺嗰度懸掛半空耗盡你嘅精力， 遲早跌落去死， 或者現在就乾脆痛痛快快地放手跌死。 何必再掙扎呢?
佢哋兩隻青蛙唔理，不斷地掙扎跳上去。 可惜跳嚟跳都跳唔到上去， 前面兩隻手又唔夠力爬上去， 只好懸掛係半空， 同死神搏鬥。 上面其他青蛙都大聲叫「你哋唔好再掙扎啦，唔好再掙扎啦，掙扎嚟都冇用㗎啦! 」
就係呢刻有隻麻鷹飛過嚟， 其他青蛙大叫，「你地放手啦，你哋放手啦! 一係就俾隻麻鷹擔咗去，畀佢咀嚼而死。 一係就而家放手，都係死，但係就更加痛快。 」 所有青蛙都同一時間大叫:「你哋放手啦，你哋放手啦。你哋放手啦... 」
其中一隻青蛙就真係聽話， 知道自己無希望，決定放棄，就放咗手，跌落去，死咗。另一隻青蛙就繼續望住上面嘅同伴，努力掙扎。
上面叫:「你放手啦，你放手啦! 」
下面就用腳按呀，按呀按!
點知真係奇蹟出現， 畀下面隻青蛙喺懸崖邊搵到舊凸出嚟嘅小石， 對腳用力一按就跳返上懸崖上面，逃出生天。
佢嘅同伴開心之餘都好意外， 個個都走埋擁抱住佢:「yeah, yeah, 但點解你啱啱唔聽我地話嘅?」
隻青蛙點答呀?
(手語)
我係聾㗎，多謝，你哋嘅鼓勵!
原來隻青蛙以為上面幫佢打氣。故事帶出咩理念?
我叫李根興博士，我個博士真係讀返嚟，唔係買返嚟㗎。 我2005入學，2011年理工大學工商管理博士畢業， 用咗三年時間讀書，三年時間寫論文。個Summary 係道。我嘅博士論文就係 Entrepreneirial Motivation Factors 創業動力決策因素。我研究咗240個創業者點解會創業，120個就真係行動，創咗業，另外120個就只係得個講字，無創業。發現原來佢哋創業都係三大決定因素。 諗嘢，聽嘢，同埋feel 嘢。
諗嘢嘅，就越諗越唔創。創業 factor 係負4。聽嘢嘅， 都係越聽越唔創，負2。最行動嘅，就係靠 feel 嘢，emotional decision making - 正3。
所以點解好少成功創業者，你會覺得佢成日諗嘢或者好聽人意見，反而通常你都話佢好有熱誠 passion。
啱 feel 做就去做啦， 真係唔好聽咁多人意見。好多人會潑你冷水， 但最重要係佢做過未先! 自己都未試過喺懸崖度跳返上嚟，就叫人哋唔好試，不知所謂!
你喺邊隻青蛙呢?
（文章內容純屬作家個人意見，並不代表本網頁立場）
贊助
