誰打亂了地產商賣樓步伐？

中原指數連升10周，現在無人夠膽講樓市幾時會下跌，有剛轉軚的評論員話升市莫估頂，這句話我們聽過了很多次，最近的一次是去年恒指升至34000點時，不少專家話股市還有大幅上升空間，叫大家升市莫估頂，放心入市，今日恒指只得30000點。在樓市方面，的確很少聽到有人話升市莫估頂，雖然指數公司負責人話現在睇唔到樓市有下跌迹象，只是上升幅度時高時低，既然永遠上升，即是叫大家買樓。 當大家滿腔熱情準備買樓的時候，原來地產商更加積極準備賣樓，復活節假期是一個極好的賣樓時間，因為每年在春節後出現的小陽春，到了復活節假期是最燦爛，地產商會把握這個機會大量賣樓。 復活節黃金檔大型新盤欠奉 今年第二季應該有8000個新樓單位供應，在復活節假期最少要賣一半，否則過了這個假期，又到了五窮六絕，賣樓又冇咁容易。但很奇怪，這個假期的新樓銷售成績似乎不大理想，不但大型新樓盤欠奉，就算其他的中小型新樓盤銷售成績亦差強人意，有人問是誰打亂了地產商的賣樓步伐，復活節假期唔賣樓，在今年餘下時間就要搞很多促銷活動，一定會影響樓市上升之勢。 其實，不同地產商在復活節假期之前，合作搞了一個大型促銷活動──「招標」。大家可以睇到以招標出售的樓價是非常高，但睇唔到地產商的高回贈，就算連銀行家亦睇唔到，所以，大家認為新樓樓價不斷上升；影響所及，二手樓樓價亦不斷創新高。 次季賣6500伙新樓是保守預測 誰不知政府突然醒覺，運房局長陳帆不但叫地產商自律，仲要求以招標賣樓時列出所有回贈，這樣就大鑊了，因為有些回贈高達樓價25%，將回贈扣除，樓價就會出現一個顯著跌幅。所以，有不少地產商立刻拉停售樓步伐，寧願浪費一個黃金檔期，否則很難向以前用高價買了那些樓盤的買家交代，不如等多幾個月才賣樓，到那時候，如果樓價上升就一天都光晒，即使樓價下跌，亦可以對那些高價買家說是因為大市下跌，他們才會減價促銷。雖然市場上預測第二季銷售量有8000個單位，我認為只可以大約出售六成，如果政府沒有打亂地產商賣樓步伐，第二季賣6500個新樓單位是保守預測。