2016-02-16
太陽報
新春佳節氣氛逐漸轉淡，各大發展商又再重新投入部署，齊齊落力啟動猴年推盤攻勢。長實地產（01113）馬頭角君柏?樓書昨日率先上載到樓盤網站，最快今個月開放示範單位同開售。據悉，同系元朗娉廷亦都最快日內公布銷售安排，實行雙盤齊發搶客。至於會德豐地產喺猴年部署開售4個新盤，當中山頂Mount Nicholson第一期有機會短期公布推售安排。
君柏刊樓書 短期開價
各大發展商近排輪住舉行新春團拜同猴年新盤推介活動，長實地產投資董事黃思聰昨日同劉Sir講，君柏?樓書已率先上載至樓盤網站，最快今個月開放示範單位同開售，有機會成為集團喺猴年首個開價樓盤。
佢透露，君柏共有228伙，標準單位實用面積由1,623至1,723方呎，同時提供12伙1樓連平台花園單位，以及12伙頂層連天台特色單位，其中連平台戶實用面積由1,574至1,671方呎，平台面積介乎692至1,016方呎。
佢仲話，集團已向代理發出君柏?宣傳及銷售委託書，項目售價主要參考何文田同埋九龍塘新盤?大單位做價。
除君柏之外，消息透露，同系娉廷開放現樓洋房以來，市場反應相當唔錯，發展商最快日內落實同公布銷售安排，相信會以招標形式推出部分洋房測試水溫。同系區內世宙亦都加推10伙星期五起發售。
至於會德豐地產常務董事黃光耀昨日就邀請一眾代理參與新春團拜活動，仲披露集團喺猴年連串推盤大計，集團喺猴年將開售4個新盤，涉及超過1,800伙，當中公司負責銷售?山頂Mount Nicholson第一期同何文田常富街1號項目，預計會先後喺上半年內登場，兩個項目分別提供17同561伙，下半年就計劃推售將軍澳南至善街同埋屯門掃管笏低密度發展項目，分別提供800同460伙。
華懋清水灣屋嗌億三
另華懋旗下清水灣碧沙路20及22號，繼上周賣咗其中1間屋後，尋日上載咗1號屋（碧沙路20號）價單，呢間洋房實用面積3,630方呎，價單售價1.3088億元，呎價36,055元，星期五起發售。