2026/11/13
湯文亮
星期四早上去到茶餐廳，有客人話打算買樓，身邊的人雖然大多數已經有樓，但仍然睇唔好樓市，叫佢睇定啲。而且連地產界都睇唔好樓市，只是話樓市明年保持平穩，而事實上保持平穩只是地產界的願望，唔通話樓市下跌，所以，暫時唔應該買樓，等樓市再跌多少少才決定。
老闆話見過不少客人，都是未能把握時機買樓，最後錯失良機，後悔莫及。買樓不是睇樓市明年會不會上升，而是睇10年後會不會上升，如果有三成升幅，而物業收益每年有3%的話，即是在這10年間，物業為業主提供6%回報，比10年期美債息還要好，所以，現在買樓仍然是唔錯選擇。
其實，唔單止要睇10年後，仲要睇10年前，如果現在樓價比較升了五成甚至更多，再升三成的機會不但不大，甚至會下跌，現在的樓價比10年前平均升了一成，所以，在10年後上升三成的機會很大，不過，這只是機會很大，並不一定會升三成，世界無必然道理。
有人唔同意話，世事如棋局局新，睇10年後樓價，點可以攞10年前的樓價來講。其實，好似賭大小一樣，本來10點或以下是小，11點或以上是大，莊家見開了很多鋪小，於是改為9點或以下是小，10點或以上是大，開小的機會仍然有，但已經大為減少。就算唔係賭仔都知道點賭，樓價只比10年前升了一成，未來10年上升的機會就比較大。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
