2026/11/12
湯文亮
星期三早上去到茶餐廳，聽到有客人話好心煩，原來客人的兒子近日學校中期考試，客人問個仔考得如何，個仔話平穩，咁就大件事，平時佢個仔話考得好好，結果是唔錯；如果話唔錯，結果是僅僅合格；如果話平穩，大多數唔合格，要搵定補習先生畀個仔，客人唔明白，個仔點解唔可以講實話。
老闆話，身為得益者，偏向自己多少是人之常情，如果問地產商點睇明年樓市，如果話好旺，最少升十幾個巴仙，最後只升幾個巴仙；如果話升幾個巴仙，最後會打個和；如果話平穩，樓價大多數會下跌。地產商是不會話樓市會下跌，最多只會話保持平穩，所以，樓價平穩其實是壞消息。
近日傳媒報道，幾個地產商的營業主管，不約而同話明年樓市平穩至微升，他們唔知道咁樣會令人誤會，樓價明年會下調，所以，如果地產商認為明年是平穩，在對外發言的時候就要話有一成升幅，市民自動會打折，唔係叫地產商講大話，不過做生意唔使咁老實。老實說，只要銀行對物業按揭回復正常，減少call loan，樓價自然會上升，除非地產商知道銀行明年仍然收緊按揭貸款，所以才會話樓市平穩。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
