《嚟香港讀書 貴得有道理》

星期四早上去茶餐廳，知道美國加息，雖然我認為不但唔應該加，仲應該減，不過加息亦是意料中事，特朗普隨即發表聲明，表示美國信譽良好，不但唔應該加息，仲要減息，最少1厘，真係英雄所見略同。

有內地客人話想請大家星期六食晚飯，原因是佢個仔來香港讀中學，搞一個升學宴，在家鄉已經在8月搞咗，希望大家賞面，而且強調不用送禮，老實說，強調還強調，禮一定要送，否則人人送自己唔送，豈不是好冇面。

內地客人問老闆知唔知在香港讀大學要幾多錢，老闆話唔知之後跟着問我，我話當客人個仔入大學時，學費應該100萬元冇找，我以為客人會話好貴，點知客人雖然話貴，但非常值得，因為香港的大學，無論在師資、同學質素都非常好，在世界排名亦在百大之內，在這個環境下受教育，4年學費100萬元又點算多，而且內地的朋友知道自己個仔來港讀大學，是非常羨慕，很少妒忌，對內地人來說，香港是名牌，但竟然有不少香港人唔知，仲拼命移民到外國去，真係好奇怪。