買樓 vs 買舖，收租十大分別！你係邊種投資者？🤔
成日聽人講「磚頭」穩陣，但原來樓同舖嘅收租邏輯完全係兩個世界！今集同你逐項拆解，睇吓邊樣啱你玩👇
1️⃣ 租金回報率：舖而家高過樓
最新數字，住宅細單位約3.5厘，大單位得2.3厘；商舖平均已達3.8厘，市場上四五六厘成交周街都係！今時今日買舖收租，回報一般高過住宅一兩厘。
2️⃣ 回報率 vs 面積：樓越細越高，舖越大越著數
住宅細單位好租過大豪宅，因為有能力租豪宅嘅人通常寧願買。商舖就相反——越大間，投資者越少，要更高回報先吸引到人，過萬呎老人院回報七八九厘都見過！
3️⃣ 交吉定連租約：樓要吉，舖要約
住宅有按揭保險，自住買家要做高成數按揭必須買交吉貨，所以「交吉樓」貴過「連約樓」2-5%。舖就冇按揭保險，有租約證明生財能力反而易借錢，「連約舖」貴過「交吉舖」5-10%。
4️⃣ 租約長短：樓一年死一年生，舖三年起跳
住宅通常「一年死、一年生」，按金兩按一上，佣金半個月。舖就至少兩三年死約，零售兩年起、飲食三年起，仲有「3+2」續租權，按金三按一上，佣金成個月，免租期裝修可以長達幾個月！
5️⃣ 空置風險：樓減租就有人接，舖隨時吉成年
住宅有剛性需求，狠心減租一兩成，一兩個月內實租到。商舖要「撞客」——行業轉型、生意難做，即使業主大減租，租客計完裝修人工入貨成本，平租都未必敢入場，空置一年半載係常態。
6️⃣ 雜項責任：樓業主煩到暈，舖租客自己搞掂
住宅租客馬桶塞、冷氣漏、門鎖壞，全部搵業主整，瑣碎投訴日日有。商舖租客全部係生意人，自己裝修自己保養，除咗結構性問題，舖內嘢業主基本上唔使理，管理負擔輕好多。
7️⃣ 租金波幅：樓穩陣小上小落，舖大上大落
住宅多成交、透明度高，加租偏離市價太多租客就走，每個約最多調整一兩成。商舖成交少、難比較，租客生意好隨時加租幾成甚至一倍；生意差時減租一半都冇人接。自2019年高位，舖租整體跌咗兩成！
8️⃣ 用途及牌照：樓簡單住人，舖要睇牌頭
住宅用途單一，只要唔搞非法劏房或賣淫，基本上冇牌照煩惱。商舖要租畀餐廳？睇來去水、電力、鮮風、消防；租畀老人院、補習社、鮮肉店？各行各業都有特定牌照要求，睇唔通就租值大打折扣。
9️⃣ 選址眼光：樓睇交通名校，舖睇人流消費
買樓收租：近地鐵、名校網（11/12/34/41校網）、近商業區（中上環／灣仔／銅鑼灣／尖沙咀），有齊呢三樣就係穩陣之選。買舖收租：核心區（中環／銅鑲灣／尖沙咀／旺角）消費力強但業主持貨力強、回報較低；民生區人流穩定、回報高1-2%，但小心北上消費壓力。記住：樓要避凶宅，舖要避死位（斜路、天橋底、貨車泊位旁）！
🔟 時間是朋友還是敵人？樓怕老，舖愈老愈值錢
住宅樓齡係死穴——銀行用「75減樓齡」計按揭，設施陳舊、不斷維修，時間係樓嘅敵人。街舖就完全相反，銀行唔設舖齡上限，價值取決於地段同人流。商圈成熟、老字號情懷，全部靠時間浸出嚟，最貴嘅舖從來都係舊舖！時間係舖嘅朋友。
______________
總結：
🏠 買樓收租——剛需穩陣、揀樓簡單、貸款易，適合初入門、追求穩定現金流嘅投資者。
🏪 買舖收租——考眼光、高風險高回報、可以長期空置，但揀啱地段回報跑贏幾條街，適合已有幾層樓在手、唔介意大上大落嘅專業玩家。
-----------------------------------------------
（文章內容純屬作家個人意見，並不代表本網頁立場）
贊助
