《中國應否制裁伊朗？》

星期六早上去到茶餐廳，有客人話美國對伊朗發起史詩怒火行動，「斬首」伊朗精神領袖哈梅內伊，當日特朗普揚言，5日就可以搞掂，現在差幾日就已經半年，美國在軍事上從處於絕對優勢，變成互有攻守，現在美國又改變玩法，準備對伊朗實施最嚴厲的制裁，呼籲中國與各國參與，否則會有不良後果。對中國來說，的確是一個難題，中國是否應該參與制裁，如果唔參與，美國會不會以此為理由，沒收中國持有6338億美元的美債。

老闆話，中國一定要配合美國對伊朗的制裁，並不是擔心美國沒收中國持有的美債，因為美國這樣做，全世界不但唔會買美債，甚至瘋狂拋售，損失最大的反而是美國。至於中國點解要配合美國，很簡單，就好似一個人入銀行攞錢，遇上劫匪打劫，劫匪叫大家唔好郁，叫銀行職員攞錢畀佢。一般來說，大家都唔會郁，銀行亦有守則要求職員聽從劫匪的說話，並不是說劫匪是正確的，只是劫匪已經瘋狂，如果與一個癲佬搞對抗，有乜損傷都無人會可憐，所以，中國配合制裁並不是怕了美國，而是美國已經陷入瘋狂。

當美國財長貝森特要求各國制裁伊朗，否則就會面對美國制裁的時候，其實是制裁自己，所有國家聽到貝森特咁講，就算唔賣，都唔敢再買美債。這就是美債息不斷扯高的原因，利大固然重要，但最緊要是保本，無人買美債，美國才是受害者。