《嫁女收彩禮愈高愈好？》

星期一早上去到茶餐廳，有客人話佢個女同內地男仔拍拖，已經到達談婚論嫁階段，男方派一位親友來協商，第一件事就是問彩禮，客人有家底，根本唔打算要彩禮，隨口回一句話幾多都無問題，只是心意而已。

不過，對方講了一個數目，嚇到茶餐廳客人彈起，立刻話自己是嫁女，唔可以要咁高彩禮，否則畀親戚朋友聽到就好失禮，以為他賣女。拉拉扯扯，最終達成協議，但彩禮的金額依然很高，有一些過意唔去，唯有買多幾件靚首飾畀個女，唔明白內地女仔點解要咁高彩禮。

老闆話，在內地有兩條數很麻煩，其一是父母醫藥費，其二是彩禮。不少子女為父母醫藥費而孭了一條大債，一世都還唔清；至於彩禮，不少父母的意識形態，仍然是當女兒是一個商品，彩禮愈高愈好，女兒亦接受，不但可以向同輩炫耀，並且可以得到娘家寵愛，最緊要就是如果離婚，彩禮變成男方的沉沒成本，提高男方的離婚代價，女仔可以保障自己婚姻，所以才要咁高金額彩禮。一段基於彩禮的婚姻其實是很危險，所以，內地離婚率是相當高，或多或少與大金額的彩禮有關。不過，各處鄉村各處例，大家覺得無問題就可以繼續運作下去。

唔好以為香港女仔唔收彩禮好笨，其實這才是最聰明之處，男方用盡辦法畀彩禮，最後成為小家庭負擔；女方家長收到彩禮之後，最後變成兒子付給別人的彩禮，所以，唔係唔收彩禮，心意而已。