2026/07/23
湯文亮
星期三早上去到茶餐廳，有客人話多年前買新樓樓花，發覺有一個條款，地產商可以在交樓前唔賣，只需要退回訂金，毋須罰款。客人當時極不願意，因為缺乏保障，但是律師同佢講，地產商退回按金的時候從未發生過。至於點解有這個條款，就是地產商擔心賣得唔好，地盤暫時唔打算起樓，所以退回訂金畀買家。老實說，買家見到咁嘅情况，能夠收回訂金自己都覺得好彩，唔會投訴。
老闆話，如果地產商見樓價升了，收返已出售單位，以後地產商的樓就無人買，所以，無地產商會收返已出售單位。
地產商唔會，英國政府會。擁有英國鋼鐵公司的印度塔塔鋼鐵，因為連連虧損，以1英鎊賣返畀英國政府，最後，再賣畀河北省民企敬業集團，轉虧為盈之後，英國政府宣布將英國鋼鐵公司國有化，敬業集團當然唔肯，事件即將進入司法程序。無論如何，在投資者的角度來看，英國可以將從自己手出售的企業國有化，除非有足夠賠償，否則以後很難搵人買英國的國有資產。
老闆話，英國政府可能以為敬業好似塔塔咁，做唔掂又以1英鎊賣返畀英國政府，又一次空手入白刃，但想唔到敬業竟然將英國鋼鐵公司做到賺錢，唯有收歸國有，否則很難向國民交代。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
