《資產貶值 業主唔敢亂使錢》

星期日早上去到茶餐廳，有客人話昨晚同老婆約了朋友去酒樓食飯，發覺原來很久冇出街食飯，茶餐廳就唔算，幾個有樓的朋友也是一樣，但有一件事很奇怪，就是大家都有穩定收入，點解以前成日出街食飯，現在去少了很多？

老闆話客人有幾個物業都唔消費，香港的消費行業唔會見到曙光，消費行業唔好，會影響很多人收入，那些人又唔敢消費，最後影響到香港經濟大環境，老闆叫客人應該大膽消費。

客人話有很多人認為有幾個物業，應該大膽消費，刺激經濟，講得冇錯，大前提是那些物業沒有問銀行借錢。而事實上相反，只有一個單位的業主唔借錢唔出奇，但持有幾個物業的業主很少唔借錢，否則，都唔會買到幾個物業。現在住宅物業下跌兩三成，商業物業下跌三四成，持有幾個物業的業主身家大為縮水，唔變成負資產者，無被銀行call loan已經是萬幸，仲邊度有心情消費。咁多往日有錢消費的業主，今日唔敢消費，香港經濟有乜辦法唔差。

還有一些只是持有一個單位的業主，他們用八九成按揭買物業，現在基本上已經是負資產者，就算他們有穩定收入，都唔敢亂消費，或者冇心情消費，甚至以性價比取向消費，邊度抵就去邊度消費，這點香港一定輸畀內地。香港的消費行業咁差，歸根究柢是物業資產貶值，大家身家少了，邊度有心情消費。