2026/07/10
湯文亮
樓價今年來升了10%，由低位反彈15%，對於睇淡樓市的人很難接受，他們當中有人話，如果唔係有人托市，樓價是不會上升，不過唔托得幾耐，7月唔跌，8月都會跌。其實，現在邊度有人托樓市，唔係唔想托，而是沒有能力去托。
托樓市的人有一個特徵，就是持有很多物業，而樓市也有一個特徵，就是愈多物業的業主愈唔掂，他們能夠守住自己擁有的物業已經很好。仲講托市，都沒有錢買樓，點托？
樓市在低位時，有新晉炒家高調入市，現在樓價比當時他們入市時大約有15%升幅，但唔見那些炒家出貨，理論上炒樓有15%賺價都唔錯，點解那些炒家仍未出貨。
我問一名新晉投資者，佢話當日買入的樓宇，部分單位有買家願意畀25%賺價，他仍然未打算賣，因為當日買樓的時候，樓市風聲鶴唳，差不多所有專家都睇唔好樓，既然當日都夠膽買，今日只有極少數，死不認輸，話樓市不跌是有人托市的專家唔睇好樓市之外，大多數都認為樓價會繼續上升，幅度可能有85%，在這個情况下，銀行又沒有逼他去賣樓，點解要現時賣樓？
物業經歷長時間 必會大幅升值
其實，現在投資物業的人心態已經變了，就算他們以往是炒樓，「薄cut」有錢賺都已經很開心，現在都改為長揸，由「炒」變「燉」，投資物業好似煮東坡肉，時間夠的話，一定夠腍夠軟，除非塊肉很差。物業也是一樣，經過一段長時間，物業一定會大幅升值，除非物業本身質素很差。老實說，做得物業投資者，眼界唔會差。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
