《華府點解唔鍾意印度》

星期三早上去到茶餐廳，有一個印度熟客剛從印度回來，他說在印度時，有不少人，包括一些有政治地位的人問佢，點解中國經常同美國頂嘴，美國對中國開徵關稅，中國立刻反制，最後美國反而要降低中國關稅；反觀印度，乜都聽美國話，甚至美國對印度開徵50%關稅，亦沒有反對，但點解仍然得唔到美國芳心。客人話今次返香港是有任務，希望可以了解箇中原因，做相應對策，可以得到美國芳心。

老闆話知道都無用，印度人是改唔到，到印度開公司開廠的人愈來愈少，離開的愈來愈多，他們最初本着比中國更低廉成本到印度，希望爭取更大利益，但到頭來成本更高，質素更低，最大鑊是各項無窮無盡的罰款，小米被罰到阿媽都唔認得，蘋果仲大鑊，面臨可能高達380億美元罰款，咁重罰款，即是打特朗普的面，試問印度又點會得到美國芳心。

印度人可能唔知道，美國人鍾意明碼實價，如果美國好似印度咁鍾意罰款，根本不用開徵關稅，貨物在進入美國之後以各種理由開罰單便可以，印度人不了解美國人心態，美國人可以畀高價，但不會畀罰款，就好似去一間餐廳，菜單幾貴都無問題，只要是心甘情願，但食完之後才收附加費，條氣一定頂住。印度以優厚條件吸納外資到印度開公司、設廠，最後開出天價罰單，試問點會有美國公司夠膽在印度落腳。美國公司唔去，美國政府又點會鍾意印度。