2026/03/23
湯文亮
今早去茶餐廳，聽到老闆問一個客人，他的家裏有私廚，點解仲要嚟茶餐廳食早餐，講用料，屋企一定好過茶餐廳，點解仲要嚟，老闆強調極之歡迎，不過想知點解。
客人話，家廚煮一份早餐，很多時都唔啱心水，不如嚟茶餐廳食。老闆話易解決，叫家廚煮三份不同類型的早餐，客人自己揀一份，雖然唔可以好似在茶餐廳有咁多選擇，起碼都可以三份揀一份。
老闆講得無錯，不少名門望族，家廚會煮幾份不同類型早餐，主人可以揀自己鍾意的早餐，唔鍾意的就掉咗去，浪費當然是浪費，不過，搵錢最大的一個目的就是可以浪費。
搵錢最大目的是可浪費
多年前我寫過一本書叫《逢三退一》，當時叫好叫座，我話有下集，叫《逢三退二》，不過後來我無寫，而《逢三退二》的精髓就是浪費，試問點可以寫。
有老友打算買樓，有幾個選擇，但是他擔心揀了A，日後發覺唔好住，而錯失了買B或C的機會，老友問我應該點樣做。我話逢三退二，買晒三個，每個單位住一陣，如果唔啱住就賣走。我以為講笑，老友真係照住做，一年後，老友終於揀到一個啱自己心水的單位，同時將另外兩賣走，發覺不但沒有浪費，而且仲賺了錢，仲潤吓我，賺錢都話浪費。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
