2026/03/17
湯文亮
星期日早上去到茶餐廳，有客人話，美以伊戰爭，霍爾木茲海峽被封，油價急升，無買期油的航空公司要輸很多錢，睇嚟要沽手上航空股。
老闆話，雖然航空公司唔買期油，油價上升要輸錢，但可以加燃油附加費，現在已經加了一倍，輸極有限，如果買期油，萬一油價下跌，可能輸得仲多。雖然大家都會話，梗係唔係現在買，等油價低迷的時候才買，就算唔贏都唔會輸。
買家或要搵油庫儲存
不過，人同此心，心同此理，當油價低迷時，就會出現大量期油合約，當合約到期，買期油的人就要提取，如果用得着就無問題，用唔着就要搵油庫儲存。
問題是無咁多油庫，如果搵唔到油庫儲存，手上期油合約就要賤賣，不單止本金全輸，仲要貼錢畀買期油的人，經此一役，航空公司都唔敢買大量期油，恐怕輸到貼地，都唔知點同股東交代。
老闆講完，大家都記得油價曾經跌至負數，不少炒家輸到貼地，因為大家從來沒有想過油價可以跌至負數，但中國就豐收，並不是說中國炒期油，而是中國有足夠油庫，既然可以免費「入油」，何樂而不為。
老實說，期油炒家即使蝕錢都要多謝中國，如果中國唔係打爆油缸，他們仲要貼多啲錢才可以搵到人接貨，經此一役，唔係咁多人夠膽買大量原油期貨。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
