《現在很少人啤殼上市》

星期日早上去到茶餐廳，聽到有客人話最近有一家上市公司賣盤、六成幾股權易手，只得約1.2億元，就算全部賣晒，都唔夠兩億元，賺盡都只是兩億元。上市要用幾多錢，上市究竟難唔難，如果很難，既然咁難才可以上市，點解要賣盤。

老闆話，在那家公司上市的時間，一家上市公司隻殼大約值10億元，不少人用盡辦法啤隻殼出嚟。老實說，當時港交所對於上市的要求很嚴格，大概每5家有資格上市的公司，只有一家申請，每5家申請上市的公司，大概只有1家可以成功上市。換句話說，100家有能力上市的公司，只有4家可以上市，既然咁難才可以上到市，隻殼就好貴，10億元可能講少咗。由於隻殼咁值錢，所以申請行政費是很高，無5000萬元都成唔到事，如果申請唔到就飲雪水，申請人可能要輸兩三千萬，不過值博率高，不少人趨之若鶩。

有買家 殼才是寶貝

很多人不明白，不少公司在上市之後立刻發盈警，令到股價跌破上市價，是否不講武德，其實這並不是武德問題，那些公司的負責人是將公司上市為終點站，既然到了終點站，盈利不是主要問題，他們是等一個買家出現買隻殼，盈利又賺得幾多錢，隻殼才是寶貝。

不過，上市公司隻殼，只是有價無市，維持上市資格每年亦要用不少錢，所以，七除八扣之後，唔會賺好多，甚至要輸錢。有人唔明白，點解內地企業會買香港上市公司，其實態度問題，香港人以公司上市為終點，內地人買香港上市公司作為起點，正是有人辭官歸故里，有人漏夜趕科場。