《豪宅加稅會不會影響樓市》

星期四早上去到茶餐廳，聽到有客人呻到樹葉都落，客人話雖然有人話加豪宅稅對樓市沒有影響，但對佢影響甚大，原因是他打算賣走一個超過1億元的豪宅單位，與買家為了100萬元拉鋸，誰不知「財爺」突然加豪宅稅，買家要畀多200幾萬元，立刻縮沙，估計短期內賣唔走，都唔知點樣應付銀行call loan。

老闆話，真係唔明白香港政府，點解開刀時第一刀一定搵納稅最重的人，在「辣招」稅推出時，第一刀亦是豪宅，超過2000萬元的物業印花稅由3.75％，升至4.25％，理由是豪宅價升得太急，帶起細價樓價，這算是不是理由的理由。其實，加豪宅稅才影響細價樓，當時的炒家唔炒豪宅轉炒細價樓，令到細價樓急升，政府要不斷加印花稅來壓冧樓市，最後做到成交量萎縮，庫房收入減少，出現財赤，可以說是咎由自取。

不過老實說，今次加豪宅稅對有錢佬來說影響不大，但令人覺得政府又開始出招打壓樓市，而且一招接一招，結果就是壓冧樓價，今日買任何類型物業都有機會輸錢，不單止打算買豪宅的人縮，連帶打算買基本民生住宅的人都會縮沙，但是唔會即時發生。當政府第二次加印花稅，這個情况就會出現，希望今次加印花稅是單一事件，否則就會影響樓市。