2026/03/06
湯文亮
星期四早上去到茶餐廳，有客人帶了一個女仔嚟，話要結婚，請大家去觀禮，女仔樣貌相當平凡，與客人的舊女友有一段距離，舊女友去選港姐，甚至可以入到決賽。大家都唔明白，以客人條件，與舊女友才匹配，點解要揀一個咁平凡女仔。唔通真係娶妻求淑女，但是，平凡並不代表賢淑。
老闆話見怪不怪，不少客人的老婆與舊女友相差一截，有客人同佢講，拍散拖更係搵靚女，不在乎天長地久，只在乎曾經擁有，但到了結婚，就要搵一個平凡，幫得到自己的女仔，拍拖同結婚是兩回事。
買樓自住一定要靚單位
我見到有不少客人帶有疑惑目光，知道他並不認同老闆講法，於是話其實同買樓租樓都差不多，同一座樓宇，買樓一定要揀高層、靚景，寧願貴少少都無問題，因為靚單位除了自己享受之外，有必要時比較容易賣得走。
至於租樓就唔同，就算租到一個靚單位，但難保在租約到期，業主收回自用，或者有人出更好租金，再租樓不但會打回原形，甚至要租一個很差的單位。但如果揀一個中低層普通單位，業主無咁容易再租出去，甚至在某個程度上會滿足租客要求，而且，租唔租的主動權在租客手上，所以，曾經擁有與天長地久是有分別。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
