2026/03/02
湯文亮
星期六早上去到茶餐廳，有客人話近日收到一個陌生電話，話佢在內地欠人一筆錢，他代表那人收數，但債主的名字又唔肯講，甚至連見面都唔見，只是叫佢將啲錢入落一個戶口，收到錢才話畀客人知債主的名字。客人當然無理佢，只是叫那人循法律途徑解決，其他無得傾，那人打了幾次電話之後，便再無騷擾佢。
老闆話，香港好彩有一國兩制，在反修例之前，不時有內地人揸住一張不知真假的內地法院文件，甚至只是一張欠單，要求某人還債，如果收唔到，不但張貼大字報，而且會去那人的住宅及公司騷擾，很多時為免麻煩，一些人見對方要求的金額不高，為免麻煩，便給予對方一些錢。
免麻煩畀錢 種下禍根
不過，他們唔知道，咁樣是種下禍根，有第一次便會有第二次，而且對金錢要求會愈來愈高，就算當事人報警，追債的人都會話，如果不是欠錢，又點會畀第一次，可能只會當是民事糾紛，雙方私下解決。現在當然是叫追債的人用法律途徑解決，不能騷擾當事人，否則，追債的人點解唔敢露面，如果沒有一國兩制，現在的「還錢黨」可以打橫嚟行。
在內地任何省市的人，隨時都會受到類似騷擾，一般做生意的人要請好多保安，但亦不勝其煩，這亦是有咁多內地人鍾意來港居住的原因，香港政府千祈唔好忽略香港這個優勢，容許「還錢黨」橫行霸道，其實是動搖香港法治的基石。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
