2026/02/27
湯文亮
星期四早上去到茶餐廳，有客人話在新年假期，去深圳住了兩日，發覺深圳比香港靜得多，客人唔明白，香港有兩三百萬人北上消費，理論上深圳應該比香港旺，但點解咁靜，有多少荒涼感覺，究竟深圳市民去晒邊？客人又發覺，不少在香港開完又執笠的食肆，在深圳不但可以生存，甚至開到成行成市。
老闆話，很多人都唔知道，深圳其實是在南方的北方城市，深圳本地人口本來不多，外來人口大多數是由北方來的，所以，每逢大時大節，當外來人口回鄉度假，又無人來旅遊，深圳便水靜鵝飛，比香港仲要靜。
其他省份食肆在深圳較易生存
至於點解有咁多其他省份食肆在深圳可以生存，而在香港不能，其實理由也是一樣。在香港，北方人不多，就算是湖南，估計不過20萬人，其他的，尤其是北方省份，很少超過10萬人在香港長住，而且，香港是美食天堂，既然已經來到香港，就無必要食家鄉菜，點解唔趁機會享受其他省份美食。
况且，港式廣東菜又在其他省份之上，或者可以享受日、韓、歐美等美食，而且在香港經營食肆的營運成本並不便宜，客源又唔足夠，令到中國各地食肆很難在香港發揚光大，但總有人唔相信，最後出現食肆開完又執，執完又開的情况。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
