《買物業睇回報更要睇前景》

星期日早上去到茶餐廳，有客人話睇中一個物業作為投資，但3厘回報不甚理想，與一般買家要求的5厘有一段距離，都唔知好唔好買。

有不少人話回報咁低，唔應該買，不如買債券，10年美債都有4.2厘，不但乾手淨腳，仲唔會俾人話是無良業主。

老闆話，債券是由一張債主寫畀債仔的欠單，如果是美債，更加是債主持槍，債仔手無寸鐵，真係買咁耐驚咁耐，如果因為回報低而唔買物業，去買債券，真的是見仁見智。不過，買物業亦應該睇回報，因為回報合理可以幫業主守住那個物業，而比回報更重要的就是前景，如果沒有前景，就算回報理想都要考慮。最後，就是博收購，如果物業被收購，所得回報將會以倍數計算，所以就算暫時回報低，甚至無回報都可以接受。

雖然有人話前景與收購都是虛無縹緲，都唔知會否發生，其實，與買黃金同比特幣一樣，大家都是睇好前景，前景唔好，黃金與比特幣都唔會升，持有黃金與比特幣的人，都希望有人出更高價來買他們所持有的投資產品，這與業主博手上物業被人高價收購差不多，而最大分別就是物業有回報，黃金與比特幣則沒有。而沒有回報的投資是很容易被出售，最後不但賺唔到甚至可能要蝕錢。