《打架唔好搵人幫手》

星期三早上去到茶餐廳，見到一個過氣社團大佬，老實說，那人兄當日殺氣騰騰，在社團界非常有名，但有一個奇怪現象，就是單打獨鬥，唔會問同門借人。當時有人唔明白，如果當日佢問人借人，能夠爭取到的地盤就更多，今日有機會，老闆立刻問那位大佬當日打交點解唔問同們借人。

社團大佬話，佢唔係未試過問同門借人，其實，就算借人，都係得自己嫡系人馬去打，借返嚟的人都只是插科打諢，無實質作用；如果打贏，他們會攞着數，倘若唔夠人打，他們早已走頭，唔會有大損失，見過鬼之後，唔敢問同們借人。

特朗普在瑞士達沃斯世界經濟論壇，非常之唔開心，參加和平委員會的國家只有十幾個，預計有40個，聯合國四常、歐盟全部缺席，到演講時大發牢騷，原來45分鐘演講延長至90分鐘，總之鬧呢個、鬧嗰個，最後，仲怪英法澳洲等國家，在攻打阿富汗、伊拉克唔落力，唔係唔去，不過總是去唔到戰鬥範圍，令到死傷的大多數是美軍。其實，最後贏了已經唔錯，如果好似韓戰、越戰，十幾國盟軍，有最先進武器，都唔夠人打，最後大敗，唔畀人笑都難。其實，如果只是美軍單打獨鬥，勝算更大，因為其他盟軍都只是插科打諢。

古代也是一樣，淝水之戰，北方前秦苻堅帶領百萬大軍，竟然輸畀只得8萬人的謝家軍。其實，苻堅只得十幾萬先頭部隊，其他都是北方各部落，他們只是靜觀其變，如果苻堅贏，他們就去搶戰利品，分土地，如果苻堅輸，他們就走頭。英法澳等部隊雖然沒有到達戰鬥範圍，但沒有走頭，已經對得住天地良心，特朗普現在埋怨，以後搵人插科打諢都難。