《有生意不擔心租唔到舖》

星期二中午去到茶餐廳，見到餐牌上竟然有煎肉餅飯，仲有鹹魚茸以及土魷煎兩種選擇，近日肉餅飯是大熱門，於是立刻落單，兩款都要。

老闆話Sorry，已經每款準備20份，但1點前已經沽清，現在做都做唔切。有客人問，如果業主見到咁好生意，會唔會加租，老闆話自己舖，不用擔心加租，其他業主就唔知道。

近日元朗有一間茶餐廳，因一篇文章令到肉餅飯大熱，有報紙話得個做字，每個月要賣834份才可以夠交租。其實，每日只賣28份，真係唔係好難做到，點會得個做字。現在出了名的茶餐廳每日準備300份，3日所賣的肉餅飯就已經夠交租，那名老闆擔心是業主加租而不是得個做字。

大多數傳媒唔明白做業主心意，所以用他們的觀點報道，以為業主見到租客好生意就會加租，其實是錯到不得了，我不排除有業主咁樣做，但只是少數，一般擁有多個物業的業主見到租客好生意，不但唔會加租，甚至會要求租客提早續約，加多少就難免，不過唔會太離譜。所以大熱肉餅餐廳老闆不用擔心業主加租，就算業主真係加租，附近一定有很多業主願意租畀佢。畢竟租客好生意就是業主收入的保證，業主知道萬一加租趕走了租客，很難搵返一個生意火爆的租客，業主唔會咁蠢及咁卑鄙，大家千祈唔好以小人之心度君子之腹。