2025/08/14
湯文亮
星期三早上去到茶餐廳，見到有很多客人食完早餐之後用500元紙幣找數，收銀機本來有價值數千元的100元紙幣，但找下找下，已經所餘無幾，有客人擔心自己用500元埋單，老闆無得找續，於是打算離開。
老闆話千祈唔好走，收錢機100元紙幣只是為了方便找贖，唔通擺幾萬元100元紙幣在茶餐廳，如果用晒，會去夾萬攞幾千元100蚊紙，大家唔使擔心茶餐廳無錢找贖。有客人擔心，港元處於弱方已經有一段時間，金管局不斷接港元，在星期三早上再接70億港元，令到銀行體系結餘由千多億跌剩570億元。
最令人奇怪就是結餘跌了咁多，但同業拆息仍然處於低水平，不少人擔心，當銀行體系結餘下跌至少過500億元，甚至變成負數，金管局有何應對，會不會暫停接港元，或者大幅加息令有心人不做套戥，畢竟金管局是非常關心套戥活動。
老闆叫客人不用擔心，銀行體系結餘就是收銀機，如果唔夠錢找贖，金管局會從外匯儲備攞幾百億港元出嚟應急，全世界都知道香港有4000億美元儲備，攞幾百億港元真係「濕濕碎」，國際炒家知道香港有這個實力，都費事搞香港。
雖然不排除有人搞套戥來換取息差，相信金管是有監視那些炒家以及為他們做套戥的銀行，為了賺取蠅頭小利而搞到被金管局問話就唔係咁好。
今日在弱方保證沽港元的人，要用7.85港元來換取1美元，除非永遠唔再嚟香港投資，否則，屆時1美元最多可以兌換7.85港元。萬一港元轉為強勢，1美元只可以兌7.75港元，1億美元套戥就蝕了1000萬港元，國際炒家無理由唔知道這個道理，就算沽港元買美元可以賺取高息，但有很大可能得不償失。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
