《數據遲了公布 統計局長被炒》

星期二早上黑雨，茶餐廳竟然比平時更加多人，有客人話，在茶餐廳飲杯咖啡，傾吓偈，等待黑雨信號取消立即返工。老實說，有很多人都不明白香港人點解咁鍾意返工。

有客人話，今早在紐約時段金管局又要買港元，令到銀行體系結餘只有724億元，估計很快就會少過500億元「警戒線」，到時拆息唔知會不會上升。老闆話，現在未到都唔敢講，不過，聯繫匯率並不是靠銀行體系結餘維繫，只是方便運作，如果美國勞工統計局長早3日發表就業數據，金管局就唔使接港元沽盤，而她自己又不用畀特朗普炒魷。

特朗普以就業數據造假為由將勞工統計局長「炒魷」，造假的意思並不是「數字造假」，而是「日期造假」。現在特朗普最心急的事不是關稅，而是美國聯儲局幾時減息，而就業數據對減息是非常關鍵，如果就業數據能夠在美國聯儲局決定減息之前發表，相信鮑威爾有很大可能減息，勞工統計局長在聯儲局決定唔減息之後3日才發表就業數據，特朗普有乜辦法唔紮紮跳，唔炒勞工統計局長就出奇，整件事又唔怪得晒特朗普。

美國聯儲局減息除了令美國在美債少付利息之外，亦是面子問題，美債屬好高評級，點解要畀超過4厘咁多，咁即時話畀全世界知美債是有危險，老實說，1厘至2厘就差不多，就算美債咁高息，美匯指數仍然只是98，相比三四年前暴力加息之前，升了不足3點，既然高息不能令美元強勢，倒不如將利息下調，如果美債息下調2厘，每年少付7000億美元利息，就算唔收關稅都冇所謂。勞工統計局長被炒，是殺雞儆猴，鮑威爾雖然唔怕，但其他對息率有影響力的局長就會識做，有利減息的數據早日發表，不利的可以唔發表就唔發表，否則都要延後。