2025/07/15
湯文亮
星期一早上去到茶餐廳，有客人話昨日同朋友去睇樓，有一個奇怪現象，就是朋友一年前賣走的住宅單位，在樓價指數下跌，一片劈價蝕讓聲中，今日業主叫價比當日賣出價還要高，而且同類型單位大多數平均呎價都高於當日呎價。
客人的朋友非常失望，帶大家去睇樓，以為可以用低價執平貨，在大家面前威一威，最後仲畀代理窒，話那些劈價蝕讓有不少是銀主盤，如果唔係移民，賣樓的業主唔係咁多，仲叫客人朋友快啲買樓，有咁多內地人來港情况下，供需已經失衡，只是樓市的庫存或者潛在供應量仍然很多，令到樓價不能上升，但仍然沒有下跌。在供應不斷減少而需求增加下，唔係專家都知道樓市日後走勢。
老闆話，傳媒知道樓市已經轉勢，仍然報道樓價下跌三成已經沒有吸引力，而事實上樓價指數下跌超過三成，如果不是有一些蝕了四五成個案，根本不值得報道。近日，已經有報紙在不顯眼位置報道一些賺錢「摩貨」成交，那些「摩貨」雖然利潤不高，很少超過一成。不過，「摩貨」出現，代表樓市已經築底，再大跌的機會不大，傳媒亦是春江鴨，但很難以今天的我打倒昨天的我，所以，報道並不顯眼。
有客人話在兩年幾前賣走一個住宅單位，雖然樓價下跌兩成，但今日用當日售價竟然買唔返，唔通樓價冇下跌？老闆話，樓價是有下跌，不過，客人當日不是在最高價賣走，到今日又不能用最低價買返，當中差額可能高達兩成。所以，冇必要唔好賣走物業，尤其是自住單位，就算樓價下跌都很難買得返。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
