2025/07/14
湯文亮
星期六早上去到茶餐廳，有客人話真係唔識睇樓市，中原指數連續升了4個星期，雖然唔夠1%，但如果唔睇指數，在傳媒不斷報道低價成交，以及有評論員話樓市有無底黑洞，一定會以為樓市下跌到不亦樂乎，絕對唔會諗到樓市上升。究竟樓市應該從哪個角度來看，很快就知道升跌。
老闆話，如果任何人入嚟茶餐廳，見到坐滿晒人，甚至要等位，一定唔會同人講茶餐廳生意很差，反之入到茶餐廳，見到只得幾枱客，就算老闆話生意很好都無人信。
其實，樓市也是一樣，簡單來說，樓市睇人口，如果香港人口增加，尤其是優質人口，話樓市跌都無人信。
人口影響樓市升跌
反之，好似在疫情時候，走了幾十萬中產，而且當中有不少是賣樓離開，講樓市升都無人信；事實上，樓市下跌超過三成是不爭的事實。
所以，睇樓市，最簡單方法就是睇人口增減，人口增加，樓市一定會上升，反之如果人口減少，樓市一定會下跌，雖然未必會即時反映出來，但只會遲，唔會唔反映。
由於香港突然走了幾十萬中產人士，香港政府不得不放寬優才專才移居香港，但與此同時，以BNO去英國的香港人，有部分水土不服要回流香港。
所以，在未來一段時間，香港人口增長有機會遭受由內地移居香港的優才、專才，以及由英國回流的香港人推升，人口增長會很快。
雖然有人話來香港不一定要買樓，樓價唔會上升；事實上，內地人想法是如果唔打算買樓，就唔會來香港，唔夠實力就無辦法。至於由英國回流的香港人，就算唔買都要租樓，租金上升亦會帶動樓價上升，這就是近日樓市唱極都唔跌的原因。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
