2025/06/24
湯文亮
星期一早上去到茶餐廳，有客人話早兩日約了一班債主向一個「大天二」收數，去到後「大天二」話有個門生被人恰，遭日日淋紅油，於是佢吹雞搵對方開片，有乜事等佢打完交先講，成班債主見到「大天二」的馬仔個個兇神惡煞，唯有話等「大天二」做完正經事再嚟。
老闆話，現在全世界都唔知點解特朗普炸伊朗核設施，早兩日不單特朗普自己，甚至連白宮發言人萊維特都話在兩個星期內如果仍然解決唔到問題，就會炸伊朗核設施。至於點解會提早，估計是特朗普想用兩個星期搵盟友，以聯軍的名義炸伊朗核設施，結果除了以色列之外，搵唔到第二個國家支持炸伊朗，既然搵唔到人出名，不如早些行動，希望伊朗立刻投降，美國可以耀武揚威，獨佔花魁。
6月為還款高峰期
老闆是有道理，不過亦應該考慮，美國現在欠債太多，6月份是還款高峰期，如果唔買返啲美債，以後就冇人相信，評級機構已經調低美國評級，再跌就會有不少機構基於機制，一定要出售美債，咁樣就大件事，想唔還錢最好是打仗。
伊朗就唔好彩，內塔尼亞胡做醜人，不斷指摘伊朗即將擁有核武，其實這個指摘已經超過30年，基本上不能成為控罪，但美國當真，在沒有組成盟軍的條件下攻擊伊朗，持有美債的國家及機構見到美國正在打仗，又點敢追債，那位向「大天二」追債的客人話，咁樣同「大天二」差不多，老闆話錯了，是「大天二」同美國差不多。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
