《將常客變成闊客》

聖誕節假期，大家都感覺到人頭湧湧，做飲食零售業的人應該非常開心，但仍然有人話人流的確是多了，但旺丁不旺財，飲食零售業的增長不是很多，言下之意是怪責來港的人不願意消費，試問那些來港人士聽到之後又點會開心，既然不受歡迎，又點會再嚟香港，到最後人丁單薄，最大損失就是那些怪責來港人士不消費的人，做生意的人知道，旺丁不旺財是誤導別人的說法，其實旺財先要旺丁，就好似樓市一樣，如果冇人睇樓，成交量又點會多，只有悲觀的人才會話，雖然多咗人睇樓，但那些人未必會買樓，以咁嘅態度，做生意又點會成功。

以前做生意的人經常話，常客冇闊客，闊客冇常客，香港老牌食肆視為金科玉律，食肆對於經常去幫襯的有錢佬，不敢介紹名貴菜式，除非有錢佬有明示，但對於一些生客，就會介紹貴夾唔飽的菜式，但如此劏客，生客只能做一次生意，所以，現在已經有所改變，對於一些第一次幫襯的生客，都唔會介紹名貴菜式，待生客變成常客之後才會介紹，盡量將那些客人變成闊客，常客是闊客之源，闊客之本，並不是常客冇闊客。

香港亦是一間老牌名店，如果我們只識得招呼來港大量消費的人，而忽視消費不多的旅客，最終無論大額消費或者消費不多的旅客都會慢慢減少，對香港是不利的，最正確做法是對旅客一視同仁，盡量將他們變成常客，當他們習慣了香港，知道所買的都是正品，就夠膽在港消費，常客變成闊客才是待客之道，投訴那些消費不高的旅客，最後蝕底的都是香港。