《未能雪中送炭 也不落井下石》

我多口問一句，如果浸大排名大幅下跌，他們會不會取笑我，內地朋友亦是生意人，答案當然是不會。未能雪中送炭，亦不會落井下石，唔似得香港「執笠群組」，捐窿捐罅搵一些執笠或者就嚟執笠的舖頭出嚟公諸於世。其實，當事人無論是什麼原因執笠，都未必想其他人知道，執笠群組將他們執笠的消息公開，無形之中是落井下石，令當事人受害，自己又沒有得益，損人不利己，最下等之人也。

我問過一個很喜歡將別人執笠消息放上網的人，點解要咁樣做，他回答是市民有知情權，我認為是浪費時間，如果得閒不如諗吓點樣搵錢仲好。知情權只不過是揭人私隱的一個藉口，最奇怪的就是將執笠消息放上網的人幾乎全部都是匿名或者是假名，他們的理由是擔心受害人報復，連受害人都沒有知情權，點解可以用市民知情權揭人私隱。

執笠群組可能不知道，他們將舖頭執笠消息公開，已經令不少老友反目成仇。我有一個朋友參加一個聚會，其中一個談笑風生，大講做飲食生意之道，但有人話佢的舖頭已經執笠，仲講咁多做乜，而事實上那人只是易地重開，不但不是執笠，而是做得更大，執笠群組唔知頭唔知路，就公開話那人舖頭執笠，最後令到兩個老友反目成仇，都唔知為乜。