《「雲」無心以出岫》

近日有不少內地老友打算在香港設立家族辦公室，我當然樂見其成，自不然要出席一些飯局。在早前的一個台州菜飯局上，有人問內地老友，馬雲在香港睇巴塞爾藝術展後會不會回內地。內地老友話點解唔會，「雲」無心以出岫而已，馬雲只是出外旅遊，玩到夠自然會返回中國內地，鳥倦飛而知還。

做名人的確很辛苦，馬雲出外旅遊，又畀人講到自我放逐，唔會再返中國，原因是螞蟻金服未能上市，馬雲頂住條氣，變成螞蟻不服，認為中央政府有心刁難，所以自我放逐。其實馬雲慶幸螞蟻上唔到市，否則有不少內地人士利用從螞蟻所得的貸款，買埋晒乜債物債，今日就損失慘重，矛頭一定會指向馬雲，所以，馬雲絕對不會因為螞蟻上唔到市而離開中國，一定有一些大家都不知道的原因。

馬雲最終鳥倦知還，日前回到內地，阿里巴巴（9988）亦準備重組六大產業，股價昨日飈升一成多。明白了，馬雲暫時離開中國其實是運籌帷幄，決勝千里之外，同時亦轉移大家視線，好讓張勇專注重組阿里巴巴，現在時機成熟，馬雲鳥倦飛而知還，最衰我中文唔好，唔知道內地老友所講的「雲」無心以出岫，即是馬雲將會回國之意，否則，一定會買多少阿里巴巴，起碼夠錢食一餐任乜記開價的台州菜。